Гьашину 28 шин хъанахъиссар совет аьрал Авгъаннава буккан бувну

Гьар шинах кунна, гьашинугу февраль зурул 15-нний МахIачкъалалив интернационалистурал паркраву хьунни авгъан дяъвилуву жанну дуллусса дагъусттанлувтал дакIнийн бичлачисса митинг.

А. Аьбдуллаева
[responsivevoice_button voice=»Russian Female» buttontext=»ВИЧIИ ДИХЬЛАН»] Чил билаятирттай аьрали бурж биттур буллай жанну дуллусса вирттаврал аьпалул кьинину цIакь хьунни ва кьини Аьрасатнал тарихраву 2011 шиная шихуннай. Чил билаятрай къучагъшиврий жанну дуллусса вирттал дакIнийн бичин бувкIун бия Авгъаннал ветерантурал координационный советрал председатель, отставкалийсса генерал-майор Оьмар Муртузааьлиев, мунал хъиривчу МахIаммад Арипов, МахIачкъала шагьрулул бакIчинал хъиривчу Запир Алхасов, ДР-лул ЗахIматрал ва социал иширттал министрнал кIанайсса Расул Ибрагьимов, мунал хъиривчу Зураб Багомедов, Авгъаннал ветерантурал МахIачкъалаллал отделениялул советрал председатель Аьли_султан Аьлисултанов, ДР-лул СаллатIнал ниттихъал комитетрал председатель Зульфия МахIаммадова, аьралитал-интернационалистал.
Митинг тIитIлай, ихтилат бунни Оьмар Муртузааьлиевлул.
— ХIукуматрал каялувчитурал хIукмулийну, азарахъул жула жагьилтал лавгссар Авгъаннал аьрщарай аьрали бурж биттур бан. Та билаятрай да­гъусттанлувтурал ккаккан дурссар хIат-хIисав дакъасса къучагъшивуртту. Ав­гъаннал халкьунначIа жула чиваркIуннал кьимат лавайну бивкIссар, иш багьний талангу, дусшиву дангу кIулсса буну тIий. Тай шиннардийри жула хIукумат хьхьичIра-хьхьичI хьунадаркьу­сса ярагъуннищалсса террористуращал, — увкунни Оьмар Муртузааьлиевлул.
Цала ихтилатраву Зураб Багомедовлул бувсунни республикалий интернационалистуран мадарасса хIаллихшиннарду дурну душиву. ХIакьинусса кьини 400-ннийн бивсса ветерантурал субсидияртту лавсшиву, гьашинугу 60 кулпатран ичIаллил шартIру къулай дансса кумаг бантIишиву. Запир Алхасовлул кIицI лавгунни 10 шинай лахъи лавгсса Авгъан дяъвилул къучагъшиврул лажин чирчушиву билаятрал тарихраву, Авгъан дяъвилул участниктал ялун нанисса никиран Ватан ххирашиврул ва виричушиврул эбратну хъанахъишиву, миннал кумаг, маслихIат хIакьину хъинну бучIи ляхълай бушиву жяматийсса организациярттан, школардан, миннал кумаг аьркин багьлай бушиву жула халкьуннан къакьамулсса идеология ппив хьун къаритан.
— МахIачкъала шагьрулул администрациялущал цачIу жу хIарачат буллай буру авгъанцынан кумаг бан, миннал ичIаллил шартIру къулай дан. Шинал, шин ва дачIиннул хьхьичI шагьрулул администрациялул ва Дагъусттаннал ХIукуматрал 60 квартира буллуссар Авгъаннаву бивкIминнан. ЦIанагу миннан ичIаллил шартIру къулай дансса сертификатру дуллали­ссар. ЛивчIсса 150-гу ветераннан ми бюхъавай ччяни дулунссар тIий ура, — увкунни Аьлисултан Аьли­султановлул. Ихтилатру къуртал хьуну махъ Авгъаннаву­сса дяъвилий жанну дуллуминнансса гьайкалданучIа тIутIив дирхьунни.
Вара кьини ссят 15.00 хьу­сса чIумал Каспийскалий, хьхьирил зуманив, бюхттулсса даражалий тIиртIунни Авгъан дяъвилия зана къавхьусса Каспийск шагьрулиясса 6 виричунал аьпа абад буллалисса гьайкал.
Гьайкал тIитIлатIисса мажлисрай гьуртту хьун бувкIун бия шагьрулул администрациялул, жяматийсса организациярттал вакилтал, Энергетический, Медицинский колледжирттал студентътал, чил билаятрай аьрали бурж лахълай къучагъшиврий жанну дуллусса вирттаврал нинухъру, ссурвал, гъан-маччами.
Каспийск шагьрулия аьрали бурж биттур бан Авгъаннавун лавгун ур 125 жагьил. Миннава чIявуми личIи-личIисса орденнан ва медаллан лайкь хьуну бур, 50-нния ливчусса чулахъ хьуну бур. Ряха виричунал – И.И. Адаевлул, Р.А. Аьлиловлул, А.А. АхIмадхановлул, М.А. ХIажиевлул, Р.Х. Кьурбановлул, А.Р. МахIаммадовлул – къучагътурал кунна жанну дуллуну дур. Вай ряххунналагу цIа чирчуну дия ва кьини тIиртIусса лухIисса мармарчарил гьайкалданий.
Гьайкал тIитIлатIисса мажлисрай ихтилатру бунни Каспийск шагьрулул бакIчи МахIаммад Аьбдуллаевлул, Оьмар Муртузааьлиевлул, мунал хъиривчу МахIаммад Ариповлул, Авгъаннал Ветерантурал союзрал председатель Нажмуттин Акаевлул. МахIаммад Аьбдуллаевлул барчаллагь увкунни гьайкалданул автор, художник Аьли МахIаммадовлухь ва ххаллилсса гьайкалданухлу.
Мажлис къуртал хьуну махъ цинявннайн оьвкунни «Москва» кинотеатрданул залдануву тIивтIусса авадансса ссупралухун. Шиккугу хьунни Авгъаннаву аьра­ли бурж лахълай бивкIминнал ккаккан дурсса къучагъшивурттаясса, хIакьинусса вайннал оьр­мулиясса ихтилатру. Авгъан дяъвилул ветерантал лахъа-хъун бан бувкIун бия Дагъусттаннал эстрадалул балайчитал.