ЧIярусса шиннардий Дарбантливсса 149-мур аптекалул хъунмурну зий бур Хъусращиял шяравасса МахIаммадова Шюъбанат АхIмадлул душ. Ва ларгсса шинал ахирданий МахIачкъалалив хьусса «Будущее России в руках матерей» тIисса форумрай гьур­тту хьуссар Шюъбанат.

ХIажимурад ХIусайнов
Муниннин Шюъбанат лайкь хьуну бур Дарбант шагьрулул «Шинал хъамитайпа» цIанилусса завалун. Уттигъанну на хьунаавкьуссияв Шюъбанат АхIмадовнащал.
— Ина хъинну ххуйну даву дачин дуллалисса аптекалул давурттал пишакар бура. Вил кIулшивугу му касмулийсса дур. Бухьунссар, ина бакъагу, шагьрулий цаймигу хъами хIарачат буллалисса. Амма такну вин му зава ци хIисавравун ларсун дуллухьунссар?
— Гьай-гьай, бур шагьрулий чIявусса, цала бюхъу-хъитлий кулпатругу ябуллай, багьайсса кьяйдалий налогру паччахIлугъран дуллалисса ишбажаранчитал. Нагу хъанахъиссара мукунсса ца ишбажаранчи. На тачIаввагу архну къабацIара шагьрулий хъанахъисса жяматийсса давурттаятугу. Майрал 9-нний ккаккан дувайсса концертирттан спонсоршиву дувара, Лазгиял театрданул чIарав бацIара. ХьхьичIрасса шиннардий бучIайссия Лакрал театр Дарбантлив. Гайннал чIаравгу бацIайссияв. Жула оьрчIру дук­лай бивкIсса 12-мур школалунгу кумаг бувайссия. Дарбантлив бур нитти-буттал кьабивтсса оьрчIансса «Центр реабилитации детей». Шикку бикIай ургала лякъиннин ягу оьрчIал къат­равун тIайла букканнин буруг­лагисса оьрчIру. Вайннан аьркинну дикIай лаххия, дукия, даруртту ва цаймигу затру. Вайнналгу чIарав бацIанмур бувара на. Ттула пикрилий, вай затру хIисавравун лавсун дуллухьунссар ттун ва цIагу.
— Барча вил зава, Шюъбанат АхIмадовнай! Бюхълай личIаннав вания гихунмайгу чIарав бацIлан. На рязиссара ттула миллатрал дянива ина кунмасса, дакI гьартасса хъамитайпа бувккун тIий.