Жула оьрмулул шинну чIяру хъанай, вила ва шяравачунал ганиннинсса оьрмулул шинну дакIнийн дичлачийни, чIалан бикIай ххуймур ва оькки­мур. Бунияла, га СССР дусса чIумал, школалий, техникумраву, училищалуву, институт­раву дулайсса кIулшиву хъинну луртамалущалсса дикIайва. Га чIумал Вихьуллал шяравасса Амиров Амир (Амирав), медучилищагу бувккуну, шяравусса цIуллушиву дуруччаврил амбулаториялий 21 шинай каялувшиву дуллай икIаврил буслай бур ванал куртIсса медициналул кIулшиву диркIшиврия. Амирав, къашайшалал анализру дуваннинна, ци цIуцIаву ду­ссарив диагноз дишайсса хIакин икIайва.
ХIажимурад ХIусайнов
Вихьуллал шяраву 7 класс къуртал бувайхту, Амирав дук­лан увххун ур МахIачкъалаллал медучилищалувун. Мугу къуртал бувну 1959-ку шинал фельдшернал касмулул дипломращал, зун тIайла увккун ур Бабаюртуллал райондалийсса Татаюртуллал шяравун. Гикку Амирав зий ивкIун ур 1963-ку шинайннин. Га шинал ванал кулпат бувну бур, ччаврил дуламанттайхгу лавгун, Вихьуллал Рукьижатлул ва Аьлиллул душ КьурбанпатIима бувцуну.
1973-ку шинал ивтссар амбулаториялул хъунаману. Ва амбулаториялийн хъар хъанай диркIссар мукунна Ссухъиящиял ва ЦIуйшиял шяраваллугу. 1994-ку шинал шяравун лахъсса медициналул кIулшиву ларсъсса Кьадирова КьурбанпатIима бучIайхту, шиккува зун ивкIссар медбратну.
Амиравл ва КьурбанпатIимал кулпатраву хьусса ряхва оьрчI-душнивату кIия арс, чIун дияннинма, ахиратравун лавгун бур. Вайми оьрчI-душру цалла дакIурдин кьамулсса касмурдай зий бур.
Амирав икIайва, инсантурал цIуллу-сагъшиврул ялув авцIусса, зат кIулсса пишакар акъагу, дакI хъинсса, дустал бугьайсса, буллалисса ихтилат цIу буну бувайсса, чIявукIулшиву дакъасса зунтталчу. Шиккува ххи буван ччива Амирав дунияллул гъунттулу хъанахъимур лаласун шайсса, Вихьуллал шяраваллил интеллигенциялул ца уртакьну ивкIшивугу.
Кьадирова КьурбанпатIима Вихьуллал амбулаториялул хъунмурну бивтния махъгу, Амиравл ялагу 10 шин дурссар зий, цува 2004-ку шинал аьпалухьхьун гьаннин. ХIакьинусса кьинигу Амирав бусраврай дакIнийн утлайн­ма бикIай Вихьуллал жямат.