Февральданул 15-нний МахIачкъалалив Дагъусттаннал БакIчи Рамазан АьбдуллатIипов хьунаавкьунни АьФ-лул национал гвардиялул аьралуннал Федерал къуллугърал директорнал 1-ма хъиривчу – АьФ-лул национал гвардиялул аьралуннал главнокомандующий Сергей Меликовлущал.
«ЦIанасса ппурттуву жу дузал барду Росгвардиялул циняв кIанттурдайсса органну. ДР-лийсса территориялул органдалул жун хъуннасса агьамшиву дуссар, га дузал бувссар хъинну хIадургу бувну, аьркинсса гьарзатрал щаллугу бувну, ххуйсса шартIругу дузал дурну. Дагъусттаннайсса Росгвардиялул бакIчину ур чIярусса шиннардий Дагъусттаннал мюхчаншиву дуруччавриха зий ивкIсса инсан, ганан дуллусса наградарттал ва Аьрасатнал Виричунал цIанил му зат тасттикь буллалиссар», — увкунни Сергей Меликовлул.
Ганал мукунма Дагъусттаннал БакIчинахь барчаллагь увкунни Росгвардиялул иширттацIун бавхIусса масъаларттах къулагъас дуллалаврихлу. Ганал мукунма барчаллагь увкунни ДР-лул виваллил иширттал министерствалухь федерал органдалул тIалавшинну лайкьну биттур дуллалаврихлу.
Дагъусттаннал БакIчинал цалвамур ихтилатраву увкунни: «Жу Ватандалул хьхьичI жулва бурж биттур буллалиссару, инагу вилва бурж биттур буллай ивкIссара муданма лавайсса даражалий. Ттул пикрилий, ина хъинну лайкьну зий ияв Аьрасатнал Президентнал СКФО-райсса вакилнал къуллугърай, мунияту бусравнугу ияв агьалинан. Жу вихь барчаллагь тIий буру цачIу дурсса давурттахлу ва вихну буру Росгвардиялул Аьрасатнал Федерациялул сий гьаз дуваншиврий».
Муния махъ Рамазан АьбдуллатIиповлул Сергей Меликовлун дуллунни «Дагъусттан Республикалул хьхьичI лайкь шаврихлу» тIисса орден.
Хьунабакьаврий гьуртту хьунни АьФ-лул национал гвардиялул аьралуннал Ухссавнил Ккавкказуллал округрайсса командующийнал хъиривчу Николай Долонин, ДР-лийсса Росгвардиялул управлениялул хъунама МахIаммад Баачилов, ДР-лул Халкьуннал Мажлисрал Председатель Хизри Шихсаидов, ДР-лул БакIчинал ва ХIукуматрал Администрациялул каялувчи Исмяил Эфендиев.
