Дагъусттаннал парламентрал спикер Хизри Шихсяидовлул бувсунни Дагъусттаннал БакIчинал ДР-лул Халкьуннал Мажлисрайнсса Рисалалул хIакъиравусса цалва пикри.
Хизри Шихсяидов: «Дагъусттан Республикалул БакIчинал гьарца шинахсса Рисала – га стратегиялул документри, таний дурну дур оьрмулул циняв арардаву хьун дурсса хIасиллу, мукунма ккаккан бувну бур республика хьхьичIуннай дачин даврил гьануми ххуллурду.
Рисалалуву дурну дур республикалул циняв арардавусса, яни жяматравусса политикалувусса, социал-экономикалул бутIувусса тагьарданул анализ. Мунил гьанулий властрал циняв къяртрал хьхьичI бивхьуну бур щаллу буллан аьркинсса масъалартту.
Аьмну лавсун га документрал чIалачIи бувну бур социал-экономика лядуккан даврил хъунмур мурад, яни дагъусттанлувтурал оьрмулул даража лавай баву.
Ва Рисала хьхьичIминнуяр личIисса дур, шикку бувсун бур хъинчулийсса давурттал опытраяту ва чIалай бур республикалул каялувчинал дурну душиву жулла республикалий дурсса ва цайми регионнал давурттал опыт хIисавравун лавсъсса анализ. Республикалул хъунама хIарачат буллай ур къуццу тIун хьхьичIун урувгун, хIасиллу хьун даву мурадрай, муницIун бавхIуну ганал бувсунни рязи акъа ушиву цаппара министерстварттал ва ведомстварттал каялувчитурал давурттая. Ми затругу хIисавравун лавсун, Рамазан ХIажимурадовичлул баххана бунни цаппара каялувчитал.
Махъсса шиннардий тамансса давуртту дурну дур, дахханашивуртту хьуну дур. Амма Рамазан ХIажимурадовичлул Рисалалуву бувсунни, дурмунияр ххишала, бан-битанмуниягу, щаллу бан аьркинсса масъаларттаятугу. Миккугу Республикалул каялувчинал ккаккан бунни цаппара каялувчитурал щаллу бан аьркинну бивкIсса, амма чулийн буккан къабувсса масъалартту.
Ганал бувсунни ДР-лул Халкьуннал Мажлисрал властрал законну кьамул даврил ва представительшиврул орган хIисаврай бугьлагьисса кIанттул агьамшиву цахъисгу лахъ хьуну душиву. Мукунма бувсунни депутатътурал корпусраву жагьилтал гьарза хьуну бушиву.
Рисалалуву бувсун бур федерал законодательствалуву дахханашивуртту дуван аьркинну душиву, паччахIлугърал дакъами шяраваллил хозяйствалул организациярдан кумаг баврин хасну, мукунна аьркиншив мюнпатну ишла даврин хасну. Аьркинну дур закон кьамул дуван творчествалул союзирттал хIакъираву ва дахханашивуртту дуван градостроительствалул иширттан хасъсса закондалуву.
«На дакI дарцIуну ура, циняв депутатътурал жаваблувну бартлагланшиврий Рисалалуву ккаккан бувсса масъалартту. Яла гъансса чIумуву Халкьуннал Мажлисрал депутатътал гьантIиссар республикалул шагьрурдайн ва районнайн ва тикку буслантIиссар избирательтурахь ДР-лул БакIчинал Рисалалул мурадирттая ва бан-битанмуния», — тIий бур ДР-лул парламентрал спикернал комментариярттаву.
ХIадур бувссар
ХI. Аьдиловлул
