Февральданул 21-нний Дагъусттаннал БакIчи Рамазан АьбдуллатIипов хьунаавкьунни Каспийскаллал флотилиялул 106-мур бригадалул командиртуращал ва аьраличалтращал, февральданул 23-нний хъанахъисса Ватан дуруччайминнал Кьини барча учин.
Региондалул каялувчи моряктурал хьунаавкьунни шадлугърал тагьарданий бавцIуну, Аьрасатнал Гимналущал шамийла урагу куну. Аьраличалтрал хьхьичI махъ лахълай, Дагъусттаннал БакIчинал бувсунни АьФ-лул аьралуннал щаллагу дунияллий паракьатшиву дуруччаврил агьамшиврия.
«Аьрасатнал тарих цIакьну бавхIуну бур аьралуннацIун ва флотрацIун. Жула билаят – хъуннасса паччахIлугъри, ганил жаваб дуллалиссар цила агьалинал кьадарданухлугу, дунияллул цайми хIукуматирттал агьалинал кьадардахлугу. ЧIярусса ттуршукурдай Аьрасатнал ккаккан байссия дунияллул политикалул ххуллу-хха, амма Совет Союз пасат хьуну махъ, жува личин бувну бияв хъунмасса майдандалия. АьФ-лул Президентну Владимир Путин увчIуния шинмай тIурча, билаят цIунилгу цIу буклан бивкIунни, уттава буккан бунни цила тарихрал статус. ЦIанасса ппурттуву АьФ-лул Ярагъбу гужирдал Верховный Главнокомандующий Владимир Путиннул ва АьФ-лул обороналул министр Сергей Шойгул каялувшиврулу мархлуцIакул даххана хьунни аьралуннал диц-куц ва ганил техникалул щаллушиву. ЦIана га хъанай бур дунияллул террорчишиврущалсса талатавривусса дунияллий хъунмур гужну. Аьралунналгу, ихтиярду дуруччай органналгу, спецслужбардалгу кумаграйну террорчишиву Дагъусттаннай дух дурссар.
На барча тIий ура зухь Ватан дуруччайминнал Кьинилул байран. ЧIа тIий ура зун тIайлабацIуртту ва паракьатшиву», — увкунни Рамазан АьбдуллатIиповлул.
Муния махъ хьхьичIунну къуллугъ буллалисса аьраличалтран дуллунни ДР-лул ХIурматрал грамотартту ва Дагъусттаннал БакIчинал цIа чирчусса ссятру.
Каспийскаллал флотиялул 106-мур бригадалул командир Сергей Бобковлул Рамазан АьбдуллатIиповлухь барчаллагь увкунни цала аьралуннах къулагъас дуллалаврихлу ва барча баврихлу.
