Февральданул 16-нний МахIачкъалалив хьунни Аьрасатнал Хъунмур бувчIавурттал комиссиялул (ЦИК) кьатIувсса батIаву (выездное совещание). Аьрасатнал ЦИК-рал Председатель Элла Панфиловал каялувшиврулу дунни 2016 шинал сентябрьданул 18-нний хьусса бувчIавурттал хIасиллу ва ххал бивгьунни бувчIавурттал система ххуй даврил масъалартту.

БатIаврий гьуртту хьу­сса Дагъусттаннал БакIчи Рамазан АьбдуллатIиповлул увкунни: «ХIакьину кIюрххил Элла Александровнал ихтилат бувссар бувчIавурттал хIакъираву Аьрасатнал ЦИК-райн аьрзарду чивчуну бивкIсса партиярттал вакилтуращал ва бувчIавуртту нанав­рих буруглагиминнащал ва кандидатътуращал. Тикку гьаз був­ссар чIярусса диялдакъашивур­ттал хIакъиравусса масъалартту. Жунна аьркинссар ми диялдакъашивуртту хIисавравун ласун, 2018 шинал хьунтIисса бувчIавуртту цила низамрай дачин даншиврул. Ттул пикрилий, жулла республикалул Избирком ва территориярттал бувчIавурттал комиссияртту хъинну мюнпатну зузисса бур. Миннул хъуннасса давугу дурссар».
Элла Панфиловал увкусса ку­ццуй, хIакьину ихтилат бувссар сентябрьданий хьусса бувчIавурттал хIакъираву суаллу булун ччиминнащал. «Жулва аьмсса задача хъанахъиссар ттинин хьу­сса бувчIавурттал кампаниярттал чIумал хьуну диркIсса диялдакъашивуртту, къалпшиннарду ва мардимазаншивуртту хьун къадитаву ялун хьунтIисса бувчIавурттал чIумал. Ттул пикрилий, мукунма­сса мурад бухьунссар циняв даражардал комиссиярттал члентуралгу, партиярттал вакилтуралгу, жямат­ралгу, каялувчитуралгу, Дагъусттаннал агьалиналгу. Дагъусттанлувтал – социал къатIайлашивурттал чулуха хъинну кьутIинну асар шай­сса халкь бур, мунияту аьркинссар мукъурттилгу, дуллалисса давур­тталгу дянив тапават къадикIан», — увкунни ЦИК-рал Председательнал.
АьФ-лул Президентнал СКФО-райсса вакилнал хъиривчу Михаил Ведерниковлул бувсмунийн бувну, ДР-лул бувчIавурттал системалул хъинну агьамсса ххуллу бивт­ссар. Цаппара шиннардил хьхьичI бувчIавурттал чIумал жяматраву низам лияйссия, биявуртту шай­ссия ва цаймигу къалмакъаллу ва диялдакъашивуртту шайссия. ДукIу ссуттил хьусса бувчIавурттал чIумал ДР-лий диялдакъашивуртту чан-кьансса хьуна, агьалинал кьамул дуруна чIурду булаврил хIасиллу.
ДР-лул БувчIавурттал комиссиялул председатель МахIаммад Дибировлул бувсмунийн бувну, дукIу ссуттил дурсса бувчIавурттая махъ Дагъусттаннал БувчIавурттал комиссиялийн бувкIун бивкIссар 105 аьрза, миннувату ххал бивгьуну бур 78, 27 аьрза тIайла бувккун бур ихтиярду дуруччай органнайн.
Республикалул судирттай ххал бивгьуну бур бувчIавурттай гьуртту хьуминнал иширттал хIакъиравусса 25 административ иск, циняв аьрзардан хасну инкар буллалисса жавабру дуллуну дур судирттал.
ДР-лул виваллил иширттал министр Аьбдурашид МахIаммадовлул бувсунни бувчIавурттал чIумал ихтиярду дуруччай органнал аьдлу-низам щаллу даврил хIакъираву.
БатIаврил хIасиллу дуллай, Элла Панфиловал бувсунни АьФ-лул Хъунмур бувчIавурттал коми­ссиялийн Дагъусттаннаяту бувкIун бивкIшиву 111 аьрза. «Ми билаятрал цайми регионнаяту бувкIминнуяр чанссар. МуницIун бавхIуну жунма цинявннан аьркинссар жаваблувну лахьхьин буллан бувчIавурттал комиссиярттал члентуран цукун зун аьркинссарив, бувчIавурттайн гьарзану кIункIу буллан политикалул партиярттал вакилтал, ялув бацIаву тIайлану щаллу дулланшиврул. БувчIавурттал комиссиярттаву бикIан аьркинссар сий дусса инсантал. Цанчирча жулва цинявннал мурад цар – инсантал бувчIавурттайн вих шаву», — увкунни Элла Панфиловал.