Туркнал оьвкуну, тайнначIан лавгун бувкIунни ЦIуссалакрал райондалул делегация.
П. Рамазанова
Ва делегациялуву буссия Аьрасатнал Федерациялул Жяматийсса палаталул член Айгун МахIаммадов, ЦIуссалакрал райондалул хъунама ХIажи Айдиев,республикалул Халкьуннал Мажлисрал депутат Амирхан Амирханов, предпринимательтурал сообществалул вакил Аьбдулмуслим ХIасанхIусайнов. Делегациялул Туркнавунсса аьрххилул мурадгу экономикалул ва культуралул арардавусса дахIаву цIакь дуваву бур. ЦIусса миналий цIусса оьрму дузал буллалиминнал хъунмур хIарачатгу бур, гьай- гьай, зузи кIанттурду буваву. Туркнал инвестортал кIункIу бувну, «Алмар Каспиан» завод бувну, гьашину зузи бувну бур ЦIуминалий, му завод зузи буваву райондалий агьалинал маэшат гьаз бавричIансса ца хъит_ри. Агьали давурттал щаллу бувансса чараннах луглагисса райондалул хъунама ХIажи Айдиевлул агьаммур мурадгу бур экономикалул цIу-цIусса дахIавуртту цIакь дуваву. Туркнаву хъамаллуран ккаккан дурну дур ИстIамбуллал зума-къирагърайсса промышленностьрал зонарду. ЧIявусса фабрикартту ва заводру компактнайну ца кIанай бусса, ттуршлийсса километрардал лахъишиврийсса манзилданийсса объектру дусса кIанттур промышленностьрал зонарду. Икьрал дурну дур, туркнал предпринимательтал Дагъусттаннайн бувкIун, ЦIуссалакрал райондалул территориялий ва аьмну Дагъусттаннай цуку-цукунсса предприятияртту дуван дурив ххал дуван. Дагъусттаннаясса хъамаллуран, миннал цала бусаврийн бувну, культуралул программагу хIадур дурну диркIун дур. Делегация бивну бур имам Шамиллул учитель ва рувхIанийсса насихIатчи щайх Жамалуттиннул зияратрайнгу. Хъиривмур кьини делегация бивну бур Дагъусттаннал диаспора яхъанахъисса Ялова шагьрулийн. «Жу кIул бунну 19-мур аьсрулий Туркнавун ппухълу бивзминнал наслулущал. ТIааьнну бия, ватандалия ччянива арх бувцун бухьурчагу, Туркнавусса дагъусттанлувтурал ватандалухсса ччавугу ядурну душиву, ппухъруннал аьдатирттал хIурматгу бушиву. Тайннан ватандалул аьрщараясса хъамал бучIаврия хъуннасса ххаришиву дия. Туркнащалсса дахIаву хъиннура цIакь дувантIисса аьрххи хьуссар, тайгу, жугу рязину ливчIру, уттиния тинмайгу инвестициярдал кумаграйну райондалул агьалинал маэшат гьаз бувансса ххуллурду- чараннах луглай зунтIиссару», — тIий ур депутат Амирхан Амирханов. Жувагу умуд бишинну, Туркнавунсса аьрххи барачат хьуну, ЦIуминалий цIусса предприятияртту зунтIишиврийн, экономикагу сантирай ва лябукку буну хьхьичIуннай хъанантIишиврийн, захIматшивурттугу дурхIуну, район ччаннай дацIантIишиврийн.
