Январьданул 31-нний хьунни ДР-лул БакIчиначIасса Дагъус­ттан Республикалул ХьхьичIуннайшиврун ва приоритетир­ттал проектирдан хасъсса советрал батIаву.

Рамазан АьбдуллатIиповлул дакIнийн бувтунни, Аьрасатнал регионнаву цалчин Дагъусттаннал дурну диркIшиву проектрайну­ссауправлениялул дайдихьу аьмсса методикалул гьанулий, амма ца­ппара хIаллавату аьркин хьуну дур му давриву дуван цаппара дахханашивуртту.
«Мунияту дузал бувну бивкI­ссар проектирдал офисру (Идарартту) министерстварттаву ва ведомстварттаву, муния махъ ца шинавату ми офисру бувссар муниципал сакиншиннардайгу. Цаппара хIаллавату отраслирдал управленияртту цачIун бувссар ДР-лул БакIчинал ва ХIукуматрал Администрациялул организационно-проектное управлениялийн. Шанна шинал дянив хъуннасса даву дур­ссар, миннувух «Экономика чаннайн дуккан даврил» (отбеление экономики) проектран хаснугу. ХIатта кризисрал тагьарданувугума жуща бювхъунни ларгсса шинал налогирттал план биттур дурну, ялунгу 5 млрд. къуруш дучIан дуван. «Точки роста» проектрал лагрулуву бювхъунни ашкарагу бувну, налогир­ттал учетрайн ласун сайки 7-8 азара ишбажаранчи. «Человеческий капитал» тIисса проектрал лагрулуву цамур куццуй зун бивкIунни цIуллушиву дуруччаврил ва ду­ккаврил бутIраву, даххана хъанан диркIунни культуралувусса ара. Тамансса хьхьичIуннайшиву хьунни ЕГЭ дулаврил иширттавугу», — увкунни ДР-лул БакIчинал.
Советрал председательнал хъи­ривчу Аьбдулхаликь Гьиндиевлул увкумунийн бувну, приоритетсса проектирдан хасну таман­сса давуртту дурссар, амма мунийну гьашиву дуван къааьркинссар. Му давривух хIала буххан буван аьркинссар муниципалитетирттал сянаткартал, элмулуха зузими ва кIантту-кIанттурдайра давуртту дуван аьркинссар.
«ГипроГор ОАО-рал гендиректор Михаил Грудиннул ихтилат бунни «Аьрасатнал Федерация хьхьичIунмай хъит учаврил стратегия – Дагъусттаннансса бюхъурдур» масъалалия.
Рамазан АьбдуллатIиповлул ДР-лул ХIукуматрайн тапшур бунни щаллу буван зузи группа «ГипроГор» ОАО-ращал хIала-гьурттуну зуншиврул.
Дагъусттаннал халкьуннал хозяйствалул университетрал ректор ЯхIия Бучаевлул бувсунни ДР-лул хIукуматрачIасса Компетенциярдал центрданул масъаларттал хIакъираву. Га центр зий бур проектрал управлениялул опыт салкьигу бувну, системалийн буцаврил иширттаха.
БатIаврий ихтилат бунни GiR-лигалул коммуникацияр­ттал вице-президент, ТIуртIусса хIукуматрал эксперт, РАСО-лул член Эдуард Войтенкол. Ганал ихтилат бия проектрал давуртту информациярттал щаллу даврил хIакъираву.
БатIаврил хIасиллу дуллай, Рамазан АьбдуллатIиповлул бувсунни проектирдал гьанулийсса управлениялул даву ттигу дузрайн дурккун дакъашиву. «Ва система тIайлану зуншиврул му кIулну дикIан аьркинссар ХIукуматрал къуллугъчитурангу, министерстварттал ва ведомстварттал зузалт­рангу, шагьрурдайгу, районнайгу», — увкунни ДР-лул БакIчинал.
ХIадур бувссар
ХI. Аьдиловлул