Январь зурул 27-нний Дагъусттаннал вице-премьер Анатолий Карибовлул каялувшиндаралусса батIаву дия, «WorldSkills Russia» тIисса захIматрал пишарду хьхьичIунмай баврил чемпионатран хас дурсса.
И. Саидова
Ва батIаврий баян бунни «Жагьилсса профессионалтал» тIисса региондалул II-мур чемпионат хьунтIишиву фераль зурул 26-28-нний Аьли Аьлиевлул цIанийсса Спорткомплексраву.
«WorldSkills Russia» тIисса захIматрал пишарду машгьур баврилсса буллалисса идара махъсса шиннардий чялишну зий бур жулла республикалий.
ДР-лул захIматрал ва социал хьхьичIунмайшиврул министрнал цалчинма хъиривчу Мусалан Тахмановлул бувсунни гьашинусса шинал чемпионатрай 23 журалул захIматрал пишардал усттаршиву ккаккан дуллалисса бяст-ччаллу хьунтIишиву.
— Чемпионатрай гьуртту хьунтIиссар 100-нния ливчусса инсантал. ЗахIматрал пишарду машгьур баву мурадрай шиккун оьвкуну буссар вузирдал, колледжирттал студентътурайн ва 5000-нния ливчусса хъуними классирттаву дуклакисса оьрчIайн.
Ларгсса шинал кунна, гьашинугу пишалул усттаршиву ккаккан дуллалисса чемпионатру хьунтIиссар личIи-личIисса кIанттурдай. «Фрезерные работы на станках ЧПУ» ва «Токарные работы на станках ЧПУ» тIисса номинациярдавун багьлагьисса пишардал бяст-ччаллу хьунтIиссар Каспийскаллал Машиностроениялул колледжраву,
«Ремонт и обслуживание легковых автомобилей» – Автодорожный колледжраву, «Эксплуатация сельскохозяйственных машин» – Буйнакскаллал шяраваллил хозяйствалул колледжраву, «Сварочные технологии» – «Газпром трансгаз Махачкала» ООО-лул базалий, «Администрирование отеля» – МахIачкъалаливсса «Адмирал» тIисса отельдануву, — увкунни Мусалан Тахмановлул.
ЗахIматрал пишардал усттаршиврун кьимат бишлашисса жюри сакин бувну буссар пишардан хасъсса преподавательтурая ва республикалул предприятиярттай зузисса хьхьичIунсса пишакартурая.
Мукунма бучIан бувну буссар «Графический дизайн», «Сухое строительство и штукатурные работы», «Медицинский и социальный уход» тIисса номинациярттавун багьлагьисса пишардан кьимат бищун ихтиярду дусса экспертътал.
Ялув кIицI лавгсса пишардал бяст-ччаллу бакъассагу, ва чемпионатрай пишалул усттаршиву ккаккан дуллалисса бяст-ччаллу хьунтIиссар «Электромонтажные работы», «Кирпичная кладка», «Облицовка плитой», «Веб-дизайн», «Технология моды», «Кондитерское дело», «Сетевое и системное администрирование», «Инженерный дизайн CAD», «Ювелирное дело», «Парикмахерское дело», «Поварское дело», «Преподавание в младших классах», «Ресторанный сервис», «Мобильная работотехника» тIисса номинациярдай.
— Чемпионатрал программалул лагрулий пикрилий буру дуклаки оьрчIан захIматрал пишарду (JuniorSkills) лахьхьин буллалисса презентация дуван. Ва программа иширайну дузрайн дуккан даву мурадрай, жулла республикалун итадакьин тIий дур 80 млн. арцул, — увкунни «Успех» тIисса республикалул жагьилтурал центрданул директор Заур Оьмаровлул.
Мукунма ванал бувсунни «Молодые профессионалы» чемпионатрай ххув хьусса студентътал ва миннал преподавательтал гьуртту хьунтIишиву Аьрасатнал Федерациялий ва Краснодардал крайрай хьунтIисса чемпионатирттайгу.
Му бакъассагу, чемпионатрай ххув хьусса студентътал давурттал щаллу бувантIиссар Аьрасатнал Федерациялийсса агьамсса ва хъунисса предприятиярттай.
