Январь зуруя байбивхьуну, Дагъусттаннай пассажиртал бувцуну заназисса автотранспортрай навигациялул системарду ГЛОНАСС дишин тIий дур. ДР-лул транспортрал, энергиялул ва связьрал министрнал хъиривчу Юсуп МалламахIаммадовлул бусласимунийн бувну, ва даву цукун най дурив ххал дан республикалийн бучIан тIий бур Аьрасатнал Транспортрал министерствалул вакилтал.

А. Аьбдуллаева
Юсуп МалламахIаммадовлул бувчIин бунни пассажиртурал транспортрай укунсса системарду чара бакъа аьркиншиву.
Ми дирхьукун вай машинарттаву зун тIий бур леххаву рутайсса кнопка. Ца къахьунмур хьусса чIумал леххаву рутан бюхълай бур полициялийн, анаварсса кумаграйн ягу страховой компаниялийн. Ва система зузаврия хъунмасса кумаг хьун най бур пациентътурал оьрму ххассал бан.
2014-2015 шиннардий ГЛОНАСС системарду дирхьуну дур 1300 транспортрай. Миннува 400 машина бур ПАТП-1, ПАТП-2 предприятиярттал, 136 машина бур цивппа заллусса , 400 анаварсса кумаграл, 250 школалул автобусру бур, 77 машина бур ЖКХ-лул, 270 «Дагавтодорданул» .