Дунияллийн увккун 75 шин там хьунтIиссия гьашину цIанихсса режиссер, Аьрасатнал магьирлугърал лайкь хьусса ишккакку, Валерий Эфендиевлун.

Заннал ванан чивчуну бия кутIасса оьрму, 2002 шинал оьрмулул чагъираву батIул хьуна ва жуятува. Амма оьрмулул 60 шинавун ухханнин ванаща бювхъуна чIярусса хъин-хъинсса давур­тту миллатран кьаритан. Театрдануву зий дурсса 40 шинал мутталий ванал бивхьуссар 70 спектакль. Миннувасса 2 лайкь хьуссар республикалул паччахIлугърал премиялун. Лайкь хьуссар личIи-личIисса лагрулул конкурсирттал дипломирттан, хIадур бувссар ларайсса театрал кIулшиву дусса жагьилсса актертал. Ганал пьесарду хIакьинусса кьинигу бихьлайнма буссар Да­гъусттаннал ва цаймигу театрдаву.

Чялишсса бия Валерий Эфендиевлул граждан хIуччардугу, цивгу яргну аьч хъанай бия миллатрал театрданул каялувчинал репертуарданул политикалуву.
Ганал творчествалул ххуллу ссая байбивхьуссар чирча, 1964 шинал Щукиннул цIанийсса лаваймур театрал училищалул цалчинсса Лакрал актертурал студия къуртал бувсса актертал театрданувун зун бувкIсса чIумал асар хъанай бия жучIава режи­ссершиврул школа бакъашиву. Чара бакъа хIадур ан багьлай бия жула режиссер. Я бавцIуна Валерий Эфендиевлуй. Ганахь маз-кьаз бихьлангу къабагьуна. ТIайлабацIу хьуссар ганан ГИТИС-раву дуклан лавгнигу, ххаллилсса педагог М. О. КнебельлучIан бакIрайн агьну. Дагьайсса кIулшиву ларсун махъ В. Эфендиев зана хьуна цала театрданувун. Муниннин театр цуппагу бивзун бия Гъумучату МахIачкъалалив.
Жагьилсса режиссер гъирарай зий айивхьуна «Адвокат Патлен» тIисса франциянал халкьуннал къямадиялуха, Н. В. Гогольлул «Щарсса дуцаву» тIисса пьесалуха. Спектакльгу тIайлабацIусса хьуна. Му чIумалнин, жагьилсса коллективрал сахIналул усттартуращалгу маз лявкъуну, кувннал кувннан кумаг буллай, сакин буллай бия ттизаманнул ва классикалул произведениярттаясса спектакльлу. Так материал цурда ххаллилсса душивруцIун, жагьилсса режиссернал гьунар аьч бан кумаг буллалисса душивруцIун, акъая Валерий Эфендиев классикалухух лавгссагу. Классикалуву ганан ляхълай бия ттизаманнул оьрмулущалсса цалащавуртту, аьмсса буруккинтту.
Гогольлул «Щарсса дуцаву» бивхьуссар Къумукьнал театрданувугу. Амма кIивагу постановка цанниха ца хъисвагу лав­хьхьусса бакъая. Къумукьнал театрдануву бивхьумур спектакльдануву захIматну бия классикалул сипатру дуккин. Эфендиевлул спектакльдануву, тIурча, та чIумул багьу-бизу ва лаххи-ликкия тарихрацIун хIакьну даркьуну дия. Мунищала архIал ­аьщуйн щуну ккаккан дурну дия диялдакъашивуртту, аьмаллал мурдалшиву ва дакIнил мискиншиву заманалущал нанисса хасиятру душиву, ми дух дан къашайсса душиву.
Гьунар магьир хъанахъиссаксса лахъ хъанахъиссар режиссернал статусгу: хьхьичI – режиссер-постановщик, яла – хъунама режиссер, гихунай – каялувчи.
Классикалул темалух къулагъас хъуннасса духьурчагу, чIарах къауккайва Эфендиев сатиралул темалулгу. Бивхьуссар А. Сухово-Кобылиннул «Кречинскийл хъатIи». Ва спектакльдануву аьчухну чIалай бия творчествалул режиссуралул даража лахъ хьусса. Му лапва яргну аьч хьуна Ахпуевлул сипат­рал ялув режиссернал ва артист ХIасан Буттаевлул дурсса давриву. Дагъусттаннал халкьуннал артист ХIасан Буттаевлул щаллу дурсса Ахпуевлул сипат – му дур классикалул къямадиялул яла бюхттулми кьанунну гьануну ларсун дурсса сипат. Артист кка­ккан буллай ур цала геройнал трагикомедия. Цала цува щях ивщу­сса Ахпуевлуй хъярчагу, дакIнил куртIниву кьюлтI хъанай бур гьарцаннал кьаивтсса инсаннай­сса цIими. Циксса рангру кка­ккан дурну дур инсаннал психологиялуву. Ци бакъар Ахпуевлул арцул ча­гъардащалсса сценка – жагь цалла ялтту дичлан икIавай, жагь ишттахIрай гайннуйн ссунтI тIун икIавай, жагь ттюнгъану хъазамравун чIувин дуллан икIавай, жагь щяв дирчуну, ккаччи куна, гайннуйх ччех бигьлан икIавай.
Ца спектакльдания цамунийн ияннин лахъ хъанай дия Эфендиевлул магьиршиву. «Цума-цагу инсаннал цаллар жаваб дулунтIисса цалла дурсса ва цаяра махъ кьариртсса давурттал ялув!» — Дагъусттаннал Халкьуннал артист ХIасан Буттаевлул ккаккан увсса Театрданул Инсаннал увкусса вай махъру хьу­ссар В. Эфендиевлул Г. Гориннул «Геростат хъамаитан» спектакль бишинсса сипатну. Эфендиевлул спектакльдануву Театрданул Инсан ккаккан увну ур, цува ттизаманнул костюм ларххун ухьурчагу, кIирисса къюкI ва аьратталсса дакI дусса инсанну. Ишру хъинну хьхьичIва хьусса бухьурчагу, В. Эфендиевлул спектакль агьамнува ливчIун бур хIакьинусса кьинигу.
ТIалавну бия Эфендиевлул бихьлахьисса ттизаманнул драматургиялулми постановкардугу. Режиссернал муданна къулагъасралусса тема дия мяърипатрал ва рувхIанийшиврул тема. Жунма хIисав хьусса куццуй, класси­калувугу, ттизаманнул драматургиялувугу режиссер язи бугьлай ур жяматран агьамсса суаллу хьхьичI бивхьусса произведенияртту. Мукунсса произведениярттуну хьуссар А. Чхеидзел «Чинарданул манифест», К. Мазяевлул «Мусил чIимучIали», Р. Хубецовал «Ниттия дурксса цIа», М. Аьлиевлул «ПартIу ПатIима» ва цала В. Эфендиевлул чивчусса «ЧIалъаь».
Казбек Мазаевлул «Удрида бава» ва «Мусил чIимучIали» тIисса спектакллаву режиссернал хаснура къулагъас дурну дур бу­ттахъал аьдатру духлаглагаврих, лавгмунищалсса дахIаву руцлацаврих, кувннал кувнначIансса хъиншиву духлаглагаврих. Духлаглагисса шяраваллил сипатну режиссернал ккаккан дурну дур ккурчIав цанна цирдалу щядиркIсса шанна къари, зун­ттал хъамитайпалул бигьа ба­къасса кьадардания пашмансса балайрдугу тIий, ялгъузну цалла чIун гьан дуллалисса. Ва пашмансса макьан режиссер дурцуну ур щалва спектакльданий. Муниву дур куртIсса мяъна, спектакльданул геройтурал дакIнил тагьар дакъассагу, зунттал щархъал кьадарданул, халкьуннал аьдатру ва магьирлугъ духлаглай душиврул ялувсса постановщикнал буру­ккинттугу асар хьун буллалисса.
Р. ХIамзатовлул «Ттул Да­гъусттан» кьиссалия инсценировкалул журалий бувсса «АбутIалиб буслай ур» тIисса композициялуву В. Эфендиевлуща бювхъуну бур ядан авторнал стиль ва хъярч-махсара. Режиссерналгу, театрданулгу АбутIалиб Гъапуров кка­ккан увну ур увчIинну: зунттал зумуну начлилсса, халкьуннащал­сса аралуву кIукIлусса ухьурчагу, маз байлсса, жяматрал агьамшиву дусса суаллаву кьянкьасса хIучча бусса.
В. Эфендиевлул мудангу къулагъас дия цала постановкарду чIумуцIун, социал-политикалул тагьардануцIун ва жяматрал тIалавшиннардацIун бавкьуну ккаккан баврих. ХьхьичIвагу сахIналий бивхьусса миллатир­ттал автортурал пьесарду Валерий Эфендиевлул бишайва чIумуцIун ва жяматравусса тагьардануцIун бакьин бувну. Мукун бивхьу­ссар Гьарун Саэдовлул «Къалайчитал», Курди Закуевлул «Хъявринсса ччаву».
1999 шинал Дагъусттаннайн чапхунчитал ххявхсса ппурттуву, цIу буккан бувну, бивхьу­ссар Минкаил Аьлиевлул «ПартIу ПатIима». Ва спектакль, махъ бакъа, бавкьуну бия та чIумуцIун, муниву гьаз буллай бия халкьуннаву ватан ххирашиврул асарду, баллай бия «оькъавку» хъамаллурансса жавабну. Спектакль лайкь хьуссар Дагъусттан Республикалул ПаччахIлугърал премиялун.
Агарда цанма къалякъирча чIумул тIалавшиннардацIун бакьлакьисса пьесарду, В. Эфендиевлул цалагу бугьайва кьалан канил. Мукун личIи-личIисса шиннардий дунияллийн бувкссар ганал пьесарду ва ми бивхьуссар, Дагъусттаннал бакъасса, цаймигу театрдал: «Къала», «Авдал», «Дунияллийн уккан увасса инсан», «ЧIалъаь», «Шагьсаланнул тIюва», «Мурадирал щаращи», «Балкондалийсса ку». «Особняк» («ЧIалъаь») тIисса пьеса бивхьуну буссия «Театр» журналданий, «Земляные яблоки» – «Современная драматургия» журналданий, «Родник желаний» ва «Человек, который не родился» тIими пьесарду итабавкьуссар РСФСР-данул Культуралул министерствалул управлениялийхчил. Валерий Аьбдулович кьамул увну ивкIссар СССР-данул Чичултрал союзравун. Лайкь хьуссар «Аьрасатнал Федерациялул магьирлугърал бусравсса зузала» тIисса ларай­сса цIанин.
Махъсса шиннардий Валерий Эфендиев зий ия педагогикалул даврихагу. Итабавкьуссар ДГУ-рал культуралул факультетрал актертал хIадур байсса отделениялул кIива выпуск. Ванал хIадур бувсса табасараннал студиялул гьанулийну тIурча тIивтIуссар Табасараннал паччахIлугърал драмалул театр.
Щалла дакI циву дирхьуну бивхьуна В. Эфендиевлул цала минардая бизан бувсса, гихунмайгу ци бакIрачIан бучIантIиссарив къакIулсса ЦIуссалакрал райондалул кьадардания бусласисса С. Кьасумовлул «ЛухIи кьини» тIисса спектакль. Пьесалул геройтурал оьрмулуву хьусса оьсса иширттацIун даркьусса дур художник Аскар Аскаровлул декорация ва композитор Ширвани Чаллаевлул музыка.
Валерий Эфендиевлул спектакльлу хIакьинугу най буссар цанма аьзизсса Лакрал театрданувугу, цайми миллатирттал театрдал сахIнардайгу.
Гулизар Султанова,
АьФ-лул магьирлугърал лайкь хьусса ишккакку