Дагъусттаннай Ак-Гёл бяр буруччин, марцI бан итадаркьуну дур 100 млн. арцул. Мукунна гьашину арцу итадакьинтIиссар ЧIарадиял райондалийсса неххардил ва Терек ялтту къагьан зумарду лахъ дансса давурттан.

З. АьбдурахIманова
Хаснува Ак-Гёл бярнил ва ца­ппара неххардил хIакъиравусса давурттансса харжлугъ цайнма лавсун бур Щинал сурсатирттал ялувсса федерал къуллугърал. Вай давуртту нантIиссар рес­публикалул каялувшиндарал ялув кIицI бувсса къуллугърайн буллу­сса аьрзлуйхчIин. Ванийн бувну, Ак-ГёлданучIа ва Терекрай дакъа, мукунсса давуртту нантIиссар ЧIарадиял райондалийсса Ириб щарнил чIарах нанисса неххацIгу. Зунттай марххалтту басласийни, шикку нех зумардава дуклай, гъидайдихьулий хъуннасса аварашинна дикIайсса дур.
Ак-Гёл бярнийн бивсса чIя­вуми зараллу инсан сававну бив­сса бур.
БярницIухсса зумардай къатри ва цаймигу идарартту буваншиврул, халкьуннал цанма аьркинсса кIанттурдайн аьрщив, строительствалул цIинцI дичлай, хъунма­сса зарал биян бувну бур бярнил экосистемалун, мивусса биоресурсирттан.
Федерал къуллугърал итадаркьусса арцух марцI дантIиссар бярнил зумарду ва буккан бантIиссар чIанулусса гьагъ. Бярнил зумардайх, мурхьру ва къатIри бувгьуну, халкь щябикIансса, бигьалагансса кIанттурду бувансса мурад бусса бур.