Давудлул арс Шихунов Ширвани

Вай гьантрай, хъунмасса хIаллай къашавайгу ивкIун, дунияллия лавгунни ххаллил­сса хIакин, уздансса, адав-инсап дусса зунтталчу, Хъусращиял шяравасса Шихунов Ширвани Давудлул арс.

ХIайп, ччяни оьрмулува лавгунни цикссагу инсантал хъин буллай хъунмасса захIмат бивхьусса, къашайшалтран бусрав хьусса хIакин Ширвани Давудович.
ЯтIул дипломращал Да­гъусттаннал медициналул институтгу къуртал бувну, 1972 шинал ва тIайла увккун ур Липецкаллал областьрайн хIакинну зун. Липецкаллал областьрай­сса больницалийн зун увкIсса, цала пиша куртIну кIулсса жагьилсса хIакин най унува ивтун ур хъунама хIакиннал хъиривчуну. Ширвани Давудовичлул тамансса шинну дурну дур му къуллугърай зий. Шиккугу Ширвани къашайшалтрал ва цащалва архIал зузиминнал дянив хъинну бусравну ва хIурмат-кьиматрай ивкIун ур.
Цува Аьрасатнаву зузисса хIаллайгу Ширвани ватандалия, буттал кIанттуя тачIав арх къауцайва.
1985 шинал Ширвани ахиргу увкIун ур Ккуллал райондалий­сса больницалийн зун. Тания шихунай, цува къашавай хьуннин, ва больницалий Ширвани зий уссия хъунама хIакиннал хъиривчуну.
Ширванинал зузиссаксса хIаллай ккаккан дурссар хIа­киншиврул ларайсса профе­ссионализм, цала даврил опыт ла­хьхьин бувссар цикссагу жагьилсса пишакартуран.
Коллективравугу ва мудангу бусравну ва хIурмат-кьиматрай ивкIссар.
ЧIярусса шиннардий бивхьусса захIматрахлу лайкь хьу­ссар ЦIуллу-сагъшиву дуруччаврил министерствалул чулухасса цикссагу ХIурматрал грамотар­ттан ва Барчаллагьрал чагъардан. ХIакиннал пиша куртIну кIулсса Ширвани Шихуновлун дуллу­ссар «Дагъусттан Республикалул лайкь хьусса хIакин» тIисса бусравсса цIа.
Ширвани жуятува личIи шаврил кьурчIишиву кIидачIлай, жижара буллай буру кулпат Па­тIи­матлухь, душваврахь, арсурваврахь ва щалвагу агьлу-авладрахь.
РухI хъинний дишиннав, алжаннул ххари аннав, махъминнал оьрмурдай барачат бишиннав.
Хъусращиял жямат

---

Баргъгу тти левшссар

Зулайхал аьпалун

Тти ттул яруннаву
Макь кьакьлай дакъар.
Махъминнангу къатта
БачIва хьуну бур.

Аллагьнал буллусса
Ттул щалва талихI
АрхIалва зевххунни
Ина тти ттуща.

Къаданна тIурчангу,
Дур дакI аьсивну.
Аьратталшиву дур
Тти ттул уртакьну.

Тти вагу оьрмурив
Ттун бутан ливчIсса
Зулайха бакъасса
Ва дунияллий.

ЩинчIавгу къакIулсса
Ттул дакIнил къюву
Хъин дуван къашайсса
Дур цIуцIавуну.

Ина дакIний мудан
Иттав макь дукIлай,
Ва дуниял цIанну
Цан личIан давкьай.

Кьисмат бухлавгминнан
Чичрур ва тIисса,
МютIину гьармагу
ЛичIан багьлайсса.

Ци тIурчангу, ина
КъабучIанссара.
Къаттагу бявкъуссар,
Баргъгу тти левшссар.

Аллагьнал бувмунийн
Щукру барчангу.
Щавари хьусса дакI
Хъин цукун дайссар!
ЯхIия,
ш. ЧIяйми