Давудлул арс Аьзиев Мурад
Хархавар бакъасса бивкIулул кьадар бувкIунни 9-мур январьданий Аьзиевхъал ужагърайн. Къашавай усса баяннин дунияллия лавгунни ххаллилсса зунтталчу, лак ххирасса лаккучу, авцIусса кIану чIюлу байсса дугърисса чув-адамина, бусравсса Аьзиевхъал тухумрал сий хъиннура хъунна дуллалисса вакил Давудлул арс Аьзиев Мурад.
Мурад увну ур 1952 шинал Вирттащиял шяраватусса Давудлул кулпатраву. 1975 шинал къуртал бувну Дагъусттаннал шяраваллил хозяйствалул институтгу, ларсун ларайсса кIулшивугу, хьуну ур аьлимчу-агроном. Мунийну гьашиву къадурну, 1982 шинал лавгун ур дуклан Ленинградрайн, КГБ-лул лавайми курсирдайн. 2009 шиная шинай зий ивкIссар Дагъусттаннал Росимуществалий лавайсса къуллугърай.
Аьзиев Мурад 1996 шиная шинай ФСБ-лул полковникри. Буттал кIану буручлай дурсса чувшиврухлу 2000-ку шинал ванан В. В. Путиннул баян бувссия Барчаллагь.
2007 шинал лайкь хьуссар «Заслуженный работник правоохранительных органов РД» цIанин, «За службу в контрразведке 2 и 3 степени» лишандалун.
Бусрав къахьунссагу акъая Мурад, цила кIанийн дуртун кIулшиврул чулуха яла лаваймур шачIанттуйн лавхъун даву дувайсса ия. Цува зузисса кIанттай ванал ккаккан бувна цуксса итххявхсса каялувчи уссарив. Ххишала акъа за кIулсса, зузалт лагма лаган бан шайсса зузалагу, къуллугъчигу ия.
2013 шинал хьхьичIунсса ккаккиярттахлу ва кIийла лайкь хьуну ур Росимуществалул каялувчитурал чулухасса Барчаллагьран. ЧIярусса шиннардий, бивхьусса захIматрахлу, АьФ-лул минэкономикалул министрнал чулухасса Барчаллагьран лайкь хьуну ур. Гьунар бусса пишакар хIисаврай, уздансса инсан хIисаврайгу Мурад Даудович личIантIиссар абадлий дакIний.
Ва духIан захIматсса кьурчIишиву кIидачIлай, жижара буллай буру Мурадлул ичIуваминнахь, уссурссуннахь, щалвагу Аьзиевхъал агьлу-авладрахь. Махънал оьрмурдай барачат бишиннав.
Мурадлул рухI алжаннул ххари даннав, гьав нурданул дуцIиннав! Амин!
Дустал-гьалмахтал,
архIал зузими
ЖахIпардул
душ Ибрагьимова Шагьун
Оьрмулул 95 шинаву дунияллия лавгунни РСФСР-данул лайкь хьусса артистка, Лакрал театрданул цIа дурксса артистка, лавайсса пагьму-гьунарданул заллу Шагьун Ибрагьимова.
Шагьун бувну бур июльданул 1-нний 1921-ку шинал Гъумук. 1947-ку шиная шинмай махъсса чIумувун бияннин театрдануву зий лавгунни Шагьуннул щала оьрму. Ттуршрахъул личIи-личIисса кьадардал, хасиятирттал ва журардал инсантурал роллу дакIний личIанну, куртIну, вив бувххун, хъинну цила кIанийн руртун чIалачIи дайва Шагьуннул. Мунил дургьусса роллу, личIишиву дакъа – оьруснал, Ухссавнил ягу баргълагавал чулухсса хIукуматирттал чичултрал, ягу дагъусттаннал халкьуннал чичултрал пьесардавасса дикIу, ккаккан дайва дакIний личIанну, хъамакъаритансса рангру ва лугъатру, лишанну дартIун, Шагьуннул лавайсса даражалул хъамигу, хъунисса къуллугъирттайсса хъамигу, захIмат буллай, аьрщараха зузисса захIматкашнавасса хъамигу, оьрчIру хъуни буллай оьрму лавгсса ниттихъал роллугу дюхханну, дурчIинну, хъама къаританну чIалачIи дайва. Му бия хIакьсса насихIатчигу, мюрщиминнан эбратрансса зузалагу. Цила цIагу, бувгьусса ххуллугу марцIну ябувну, инсантуравугу лажин кIялану оьрму гьан бувсса инсан хъанай бур Шагьун. Мунил лавайсса захIматран бюхттулсса кьимат бивщуну, хIукуматрал Шагьуннун дуллуну дур: медаль «За доблестный труд в ВОВ» (1942), «Заслуженный артист ДАССР» (1960), «Народный артист ДАССР» (1965), «Заслуженный артист РСФСР» (1971), «Орден Трудового Красного знамени» (1986), медаллу «За трудовую доблесть» (1992) ва «Ветеран труда» (1996).
Лакрал театрданул ялувминналгу, циняв театрданул зузалтралгу кIидачIлай буру Шагьун жуява личIи шаврил кьурчIишиву арснахь Казбеклухь, мунал душнил ва арснал оьрчIахь, Умахь, Ризваннухь, миннал оьрчIахь ва щалагу лакрал миллатрахь. Жунма цинявннанмагу ххирасса Шагьуннул рухI хъинний дишиннав, алжаннул ххари баннав цув! Амин!
Лакрал театрданул зузалт
МахIаммадлул арс Сулайманов Анас
Декабрь зурул 14-нний 2016 шинал, мадарасса хIаллай къашавайгу ивкIун, оьрмулул 80 шинаву дунияллия лавгунни хъинну дакIнилгу хъинсса, давривугу хьхьичIунну зий ивкIсса, ас-намусралгу увччусса чув-адамина, ЧукIуннал шяраватусса Сулайманов Анас МахIаммадлул ва Марияннул арс.
Анас увну ур 21-мур декабрьданий 1936 шинал ЧукIуннал шяраву. Шяравува арулва классгу къуртал бувну, 1944-кусса шинал лавгун ур Каспийск шагьрулийн цала хъунама уссийчIан. Тиккува зунгу увххун ур «Дагдизель» заводрайн, цал токарьнал кумагчину, яла токарьну.
Оьрмулул 18 шин бартлагайхту лавгун ур армиялийнгу. Армиягу лавхъун, шавайн кIура аяйхту къуртал бувну бур Буйнакскалийсса кооперативрал техникум. Мунияр махъ, зийгу ивкIун, увххун ур Москавлийсса мура касмулул институтравун. Му къуртал бувну махъ зий ивкIун ур Дагпотребсоюзрал базардай хъунама товароведну, яла муххал ххуллурдал ва хьхьирил портрал базардай мукунмасса къуллугъирттай, пенсиялийн укканцIа. ДакI марцIну ва тIайлану бувсса захIматрахлу ванан дуллуну дур мадарасса бахшишру ва грамотарду.
Анас ия хъинну дакIнил хъинссагу, хIал бавкьуссагу кулпатращал, гъан-маччанащал, чIахху-чIарахнащал ва ЧукIуннал жяматращал. Цалва оьрмулуву ванал щинчIав дакIнин щунсса ягу къаччан бикIансса гъалгъавагу бувну бакъар. Мунийн бувну Анас хъинну бусраврай тIайлагу увккунни оьрмулул махъва-махъсса ххуллийхгу.
Анас жуятува батIул шаврил къумашивугу кIидачIлай, жижара буллай буру ванал кулпат Залинахь, оьрчIахь ва гъан-маччанахь. Цал бунагьирттал аьпа баннав. РухI паракьатний дишиннав, гьав нурданул дуцIиннав. Амин.
ЧукIуннал жямат
Кьурбанзабиуллагьлул арс Оьмаев Ираклий
ЦIусса шинал дайдихьулий, захIматсса азардануща ххассал ан къавхьуну, жуятува лавгунни Кьурбанзабиуллагьлул арс Оьмаев Ираклий.
Ираклий увну ур 1969 шинал Хъусращиял шяраву. Хъусрахь школагу къуртал бувну, дуклан увххун ур МахIачкъалалий строительный техникумравун. Ва къуртал бувну, лавгун ур Совет аьралуннаву къуллугъ буллан. Армиялия зана хьуну махъ дуклан увххун ур Саратовуллал автодорожный институтравун. Му къуртал бувну махъ зий уссия мастернал къуллугърай Ккуллал райондалул МСО-рай.
Махъсса шиннардий машхул хьуну ия ишбажаранчинал даврихун. Ираклий ия канил усттарсса, ас-ламус бусса чув, бювхъусса чурххал заллу. Ка-кумаг аьркиннал чIаравгу ацIайссия мудан. Гъан-маччанахсса, Лакку билаятрахсса ччавугу мяш учинсса дия.
Лавгунни Ираклий 3 мюрщисса оьрчIгу ятинталну кьабивтун. Жула учай, аьрщи лаллай, чIун лаглай, дакIнивусса къюву хьхьара шайссар куну. Цукун паракьат хьунссар ванал ниттил ва буттал къювурду, цаннал хъирив ца мукьа арс лухIи гьаттавух бивхьуну махъ.
Ссавур Аллагьнал дулуннав ниттихьхьун Умаматлухьхьун, буттахьхьун Кьурбанзабиуллагьлухьхьун, кулпатрахьхьун Салдахьхьун, уссихьхьун Исяхьхьун. Хъуннасса кьурчIишиву кIидачIлай, жижара буллай буру Оьмахъал ва ХIусайнахъал щалагу агьлу-авладрахь. Ираклийн къабуллусса оьрмугу, ванал барачатгу оьрчIан булуннав.
РухI хъинний дишиннав, алжаннул ххари аннав!
Хъусращиял жямат
Щамххаллул арс Ибрагьимов ХIажи
Январьданул 2-нний 89 шинаву дунияллия лавгунни Дюкъуллал шяраватусса Щамххаллул арс Ибрагьимов ХIажи.
ХIажи увну ур 1928 шинал Дюхълив. Цалва кулпат Гулабатуннущал цачIу вайннал ххуйсса тарбиялий, дуккингу бувну, ччаннай бацIан бунни 4 арс ва 2 душ.
Аьралуннавату зана хьуну махъ 1949-1960 шиннардий ХIажи зий ивкIссар Азирбижаннай виваллил иширттал органнаву, 60 шинал буттал шяравун зана хьуну, зий ивкIссар колхозраву, цал хIухчуну, яла удаманну. 1978 шиная шинай ия пенсиялий.
ХIажи ия шяраваллил жяматран бусравсса, хIал бавкьусса, дакI хъинсса инсан. Га дунияллия лагаврил кьурчIишиву кIидачIлай, жижара буллай буру ганал арсваврахь Магьдинахь, Мавлудлухь, МахIаммадлухь, Аьбдурашидлухь ва душварахь Шагьперихь ва Севилахь.
ХIажинал бунагьирттал аьпа баннав, махъминнахьхьун цIуллушиву дулуннав, алжаннул ххари аннав, гьаттай нур дизаннав.
Шяраваллил жяматрал
чулуха ХIасан Аьдилов
