Ва нюжмардул дайдихьулий, хъуншагьрулул бакIчи Муса МусаевлучIа хьунни шагьрулул шаннагу райондалул бакIчитал ва личIи-личIисса шагьрулул къуллугъирттал каялувчитал гьурттусса гьарта-гьарзасса батIаву. Шикку хъунмурчIин ххалбигьлай бия хьхьичIва ялув бивхьусса амрурду ци даражалийн бивну бурив, цукун щаллу хъанай бурив ххал буллалисса масъалартту.
Муса Мусаевлул цинявннан дакIнийн бувтунни шагьрулун 160 шин хъанахъисса юбилейрал хьунийн кIичIиртту, паркру, скверду бакьин буллансса давуртту ва миннуха зун цIана байбишин аьркиншиву. Ванал чIурчIав дурунни агьамми давуртту дайдишин хьхьичIгу коммунал къуллугъирттан циняр инженер сетирдал инвентаризация дуван аьркиншиврий. Амру бувунни, дакьин дан къашайсса тагьардануву духьурча, гьануцIакул ми даххана дурну, кIичIиртту бакьин буллалавриха зун. ТIутIив дугьансса кIанттурдайн, клумбардайн щин дуцинсса кIичIирттал хIадуршинна дуван.
БакIчинал хъирив ттинин цала дурсса давурттаясса ихтилатру бувунни шаннагу райондалул бакIчитурал. Вайннай гьарнай бивхьуну буссар цала-цала районнай дувансса давурттал буржру. ХъунмурчIинсса вайннаясса тIалавшинна районнал кIичIирттаву марцIшиву дуруччавур, цила чIумуй цIинцI-ччюрк дукьлай бурив ягу бакъарив ялув бацIавур, халкьуннал буруккинну щаллу бувавриха зузавур. Муса Мусаевлул мукунма маслихIат бувунни районнал бюджетирттавун арцу дучIан даврил ялувсса административ комиссиярттал даву низамрайн дуцин. Мукунма маслихIат бувунни ччя-ччяни бияван цала районнайн дагьайсса микрорайоннайн, ялув бацIан миккусса коммунал къуллугъирттал даврил. БакIчинал тавакъю бувунни цала хъиривчутурайн цайнма-цайнма багьайсса масъаларттал дузалшиннараясса докладру хIадур бан. Мукунма кIицI бувунни гьарнан халкьуннащалсса дахIаву хьхьара хьун къариртун зун аьркиншиву ва ялунгу миннащал мудан дахIаву дуну бикIан аьркиншиву. КIицI бувунни мукунссара хIала-гьурттушиву дикIан аьркиншиву социал сетирдавугу, МахIачкъалаллал хавартту бусласисса кказитрайхчIин ва телепередачалийхчIингу.
