Инсаннал оьрмулуву икIан багьлай бикIай чIарах най, оь-хъинмур бусан шай­сса дус-ихтивар, маслихIатчи. Амма на чуврив ца луттирай був­ккуссар: «Кумаг бува тIиманан бакъа, винма ччай бурчала тIий, кумагру буллан къааьркин­ссар», — тIисса далил.

Уттигъанну на ттула нава угьав ттунма заралсса, жипливусса арцу ссанчIав дакъа экьидичлачисса бунагьру ттущава буклакисса ишираву. Му затгу хьуна интернетраву вичIилухун щурщу буллалисса щяйтIаннул: «Тикку кIисса биза», — тIий, гьанавиххи увну махъ. Яла ттуя гьарца кьини 30 къуруш дугьлан бивкIуна. Га интернетравусса информациялул цукунчIав ттул аькьлу-кIулшилул луртама гьарза дуллай дакъаяча, ялагума дакIнил тагьар зия дуллай дия. Ванихава лавхьхьусса иш цамургу хьуна. ХIасил, ттуйн бакIрайн багьуна ттунма аьркин бакъасса иширттаяту чичлачи­сса ца лу. На га щала къабувккуну кьабивтссия. Улу га лу ттула библиотекалува экьиличинсса гьузгума бивуна.
Инсаннал дакIнил тагьар муксса кIукIлусса дур­хха, улу рухI дакъасса, яруннин къачIалачIисса щяйтIаннул хъяврин дуван бюхъайсса даражалийсса дур. Мунияту, хIатта жула душ-оьрчIан кулпатру бувну махъ цивппалу, цахва цивппа вичIи дирхьуну яхъанан ччан бикIайсса бухьурчагу, чара бакъа миннаяту арх бакъа, нину-ппу бакъахьурча, маслихIат буван бюхъайсса угьарасса дус-ихтивар икIан багьлай бур. Учин мукъун, щаллу­сса хIукуматрал бакIчитуралгума бикIайхха харжгу бивхьу­сса маслихIатчитал. Амма ми маслихIатчитурахьхьун вила къуллугърал хьхьури хъиннура итадаркьусса чIумал, ина бю­хъайссара къуллугърая личин. Мукун хьунни Кьиблалул Кореянал президентнан Пак Кын Хенан. Кулпат лиян бюхъай­ссар хъиннува, кулпатравусса затру цукун буванссарив цайминнахь чIявуну цIухларчагу. Шиккува бусан ччива ттула оьр­мулуву хьусса, ттухьва хъинну ххуйну маслихIат бувсса ишираяту ва га бувманаяту. На га чIумал, МахIачкъалаллал шяраваллил техникум къуртал буллалисса зурдардий цайми, ттущала дуклакисса шама гьалмахчунащал Хасаврал даралувусса ПМК-лий практикалий уссияв. Техникумрава нанисса чIумал, жухь увкуна зу ПМК-лий мастертурал кумагчиталну кьамул бувантIиссару куну. Амма жухьхьун чIатIри, муххал тталлу, кулунгру дуллуну, зузи бувунав. Гьай-гьай, му зат жун тIааьн къабивзуна. Ца нюжмардува ттул гьалмахтурал на тIайла увккунав МахIачкъалалив техникумравун аьрза буван жува мастертурал кумагчиталну къабитаврия. Ми кьинирдай 1-мур МахIачкъалалив яхъанахъи­сса буттачIан шярава увкIун ия Вихьуллал колхозрал председательну зузисса ХIасанов ШяъванхIажигу. ЦIуххаву дурну махъ на бувсъссия ганахь жува практикалийн гьан бувсса ва жухьва техникумраву увкумунил хIалкьазия. Ттун ххай бия ШяъванхIажи ттухлува уккан­сса. Агь, вил къаттай, ганал ялагума ттущал рагьуна: «Туну, зун най бунува къуллугъчитал хьун ччай бурив? Зузалан цукун арцу лякъин захIматну бикIайсса бурив кIул хьун, чанссарагу гьухъ зугу рутIин аьркинссархха. Ца чунчIавгу къагьантIиссара ина, насу вила махъунай, гайннал дуллусса давурттивгу дува», — куна. Аьпа бивул, ШяъванхIажинал дирхьусса дарсирал ттул аькьлу-кIулши авадан дурну, цайми пикрирдайн тIайла увнав. «Бунияла, тIайлархха ванал тIимургу», — тIий ура. ШяъванхIажинал ттун махъунай гьансса ххуллух ацIра къурушгу дуллуна. Амма гай ацIрагу къуруш дия, щил ларсъссияв, ттул кислува ларсун. Му затгу ттун кIул хьуна 1-мур МахIачкъалаливсса муххал ххуллул вокзалданийн ияйхту. Ттунгу, банмур бухлавгун, поезд бучIайхту, ганил магъуйн лавхъун гьан багьуна. КIий, магъуй, нава кунмасса цаймигу жагьилталгу бакIрайн багьуна. Вана аькьлу-кIулши бусаврицIун кьадарсса давугу най. Ца къушлий ца кIункIурдува дукра канакисса инсанталгума цаннаха ца цурк буллай лякъайсса бур.
Чув урвав жухьва аькьлу бусан бюхъайсса аькьлукар?