Кьуния ряхра шинал лажиндарай, ххирасса «Илчилул» дус, жува буссияв цачIу. Зул дянив чансса бакъахьунссар хIакьинугу, цалчинмур номерданияту байбивхьуну, лакку кказит кIунттил бувгьусса, бувккусса инсантал. Кьуния ряхра шинал дянив шинну, гьантри, муттарду личIи-личIисса бия. ХIакьину дуркIун дур чIун ттулла жандалун ххира­сса «Илчилул» ва, вайксса шиннардий нава батIлай, ттула лагма бивкIсса коллективралгу каялувчишиврул къуллугъ кьабитан.

Вай ххариссагу, пашманссагу, захIматссагу, тирхханнуссагу, хажалатссагу, ххувшавурттайсса шиннардил кIушивугу, яни кказитрал тарихралгу, ванил занакьулушиврул тIааьнсса жаваблувшивугу цаманал, ттуярвагу усттарнал хъачIунттай дишин. Вай шинну ттул талихIгу тирхханнугуя. Цанчирча цаламур «Илчилуву», дурус ттуршра шинал хьхьичI, Гьарун Саэдовлул увкусса куццуй, жува мяйжаннугу аьзизсса миллатран хъинбала буллай зий бивкIун тIий. Гьарнан къали­ккайссар мукун бусравсса кьисмат Аллагьная. АцIния арулла шин Лакрал театрдануву цал завлитну, яла директорну зий дував, яла 26 шин лакрал миллатрал кказитрал редакторну зий – му талихI бакъа цир?. Гьай-гьай, вай шиннардий на я чIярусса хъус махъ къадишав, я оьрчIан къуллугъру къалякъав, я цамур оьрмулул неъматрах луглай къабивкIра. Амма «Илчи», гьарцагу лаккучунан кунма, ттуннагу аьм­сса хъусри тIиссара.
ХIакьину ттул даврил му­тта бувккун бур. Шиннардил кIу­­шиву ххи хьуну дур. ЧIунгу, тIа­лавшиннугу даххана хьуну дур. «Илчи» кказитрал 25 шинал цIанихсса юбилей дурну мукьах, бучIир ттун бигьалагангу. Амма, на кказитрал каялувшиврия гьарчагу, ттул дакI ттула кулпат кунмасса коллективращалли оьрмулул ахирданийн дияннин дикIантIисса. Ттун ттуннагу вания тихуннайгу дулланмур чан дакъассар.
Вай шиннардил лажиндарай кказитралгу, редактор хIисаврай, ттулгу чIарав бавцIуну вирттал­сса, уздансса ва чумартсса лак бия. Гьармагу «Илчи» кказит чивчума му, укунагу, жул хIакьсса дусъя. Бия, кказитрал даврий дакI-лякьа цIий, иширайну, арцуйну, му­къуйну, гьарцагу хажалатссагу, тирхханнуссагу ишир­ттаву жул чIарав бавцIусса инсантал. Миннахь цинявннахьвагу дакIнийхтунусса барчаллагь тIий бура.
Барчаллагь тIий бура, кказитрайн чагъарду, макьаларду чичлай, жул даву чIюлу дуллай, авадан дуллай, даврил сий гьаз дуллай, дунияллийх ппив хьусса лакращал, жулгу хIарачатрайну, дакI дачIлай бивкIминнахь. Барчаллагь тIий бура, аьрзарду чичлай, даврихун бахчилай, къюллай бивкIминнахьгу. Миннал жу хъиннува цIакь ва сасан бувссару. Барчаллагь тIий бура ттула кулпат кунмасса «Илчилул» коллективрахь, чIяруссагу, ххиссагу, ххишалассагу захIматшивурттах къабурувгун, жула даву лажин кIялану, жангу, рухIгу харж дурну дуллай бивкIун тIий.
Кказитрал цIусса редактор хьун ччисса халкьгу чансса бакъая. ЦIуллу баннав цив. БучIия миннан, аммаки, ятсса жуйнма бияннин, цала дянивгу бухьун­ссархха коллективран тIалавсса, ччи­сса, пиша кIулсса, даву канилух дурксса инсантал увкуну, чялиш къабуклангу. Журив ххариру «Ил­чилул» ттугъ ттул кIунттища жула коллективрал дязаннива­сса, жунгу, жула миллатрангу бусрав­сса, цIанихсса шаэрнал, машгьур­сса чичул, журналистнал, Лакку КIанттух аьшикьнувасса, кказит тIивтIусса ссятрая шинай «Илчилул» яла язими зузалтрава­сса Рус­лан Башаевлул цIакьсса ва уз­дансса кIунттихьхьун буллалаврия. Барча, Руслан, вил къуллугъ! ТIайлабацIу вин вания тихунмайгу миллатрал хьхьичIсса вила бурж узданну ва дакI тIайлану лахълан. Лак машгьур буллан.
«Илчи» тIурча уттавассар. «Илчилул» оьрму абадссар, ххирасса буккуй, лак чIарав бу­ссаксса. Буруччияра жула кказит. ХIакьину так «Илчигу», Лак­рал театргу ливчIун бур лакрал рувхIанийсса культуралул барашиннану. ЧIявуссалийла учарду, уттигу тикрал банну – жува къабуруччирча, жува гьаз къабарча, жува якъабарча, вай культуралул идарарттал чирахърал лама лещан битарча, жула ялун нанисса никирал оьрчIру жула авадансса тарихрацIа, уздан­сса мархрацIа, нацIува-нацIусса ниттил мазрацIа, лакшивруцIа хьунтIиссар. Мунийн бувну – чичара, тIалав бара, ккалаккияра «Илчи» кказит.
Качар ХIусайнаева