Махъ лирчIунни ЦIусса шинал байранну, тяхъашивуртту. Амма оьрчIал дакIурдиву ттигу гъилинува бур ми байраннаясса асарду, билаятрал агьаммур Елкалул байрандалийн бакIрайн багьминнан хаснува. Цанчирча нажагьссавагу бакъахьунссар жула билаятрай Кремлилул Елкалул байрандалийн гьансса хиял дакIниву бакъасса оьрчIру.

Зулайхат Тахакьаева
Аьрасатнал лишанну ва билаятрал яла агьаммур Елкалун ккаллисса байрандалун хьуну дур 60- нния лирчусса шинну. Аьдатравун багьсса куццуй, Аьра­сатнал Президентнал иширтталсса буллали­сса управлениялул ва Москавуллал ХIукуматрал гьурттушиндарайну Москавуллал профсоюзир­ттал федерациялул гьарца шинал декабрь зурул 25-нния январь зурул 6-ннийн дайссар Кремлилул Елкалул байран. Ва чIумул дянив Кремлилул личIи-личIисса заллаву шай­ссар ЦIусса шинан хас дурсса жура-журасса представленияртту. Ми­ккун бучIайссар билаятрал гьарцагу мурцIния, сайки кIива миллиондалийн бивсса оьрчIру.
Миннувасса цаннийн бакI­райн багьансса талихI хьуну бур жула лакку оьрчIангу. Александровский заллануву «Лукоморье» представлениелий бивкIун бур Гъумучатусса Дамадан ва Аслан Шавлухъовхъул ва вайннала ссурахъу ХIусниева ХIабибат. Дамадан ва Аслан дук­лай бур МахIачкъала шагьрулул 56-мур школалий, ХIабибат Гъумучиял школалий.
Цивппа та-бунугу Кремлилул Елкалийн бакIрайн багьан­ссару тIисса пикри-хиялвагу тачIав дакIнийн къабагьайва, тIий бур оьрчIру. «Ча бирив­ссияввагу къакIула, мукьва билет лавсун увкIун, оьрчIан оьрмулухун дакIний личIансса бахшиш дурунни ттула уссил Рашидлул. Мукун дакIний-мазрайвагу бакъанма вайннащал навагу ЦIушинал магьлувун бакIрайн багьунна. ДакIнийвагу бакъар оьрчIний ттунма мукунсса хиял бивкIссариввагу,» — тIий бур Дамаданнул ва Асланнул нину Раисат.
Представлениялия махъ оьрчI­ру бувцуну бур хъуншагьрулул ябацIанми кIанттурдайн экскурсиялий. Арулчинмур кла­ссраву дуклакисса Дамаданнун яла-яла ххуй бивзун бур Ярагъуннил палаталувунсса экскурсия. Ванаяр мюрщисса Асланнун ва ХIабибатлуннив хIаз бивзун бур ЦIушинал магьа, байкъалитIавай буслай бур Москавуллал ччеххулиягу. Шамагу тIурча хIайран хьуну бур тийх хIакьсса кIи дия тIий, МахIачкъалалив марххала нажагьвагу янин пар къачайсса Дамадан ва Аслан хаснува.
Ххарисса асардал авадан­сса хьуннав зун ЦIусса шин, оьрчIрув!