Ларгсса шинал декабрьданий Дагъусттаннай муштаритурал багьри, яни дукиялухсса, лаххиялухсса ва цаймигу ичIура ишла даймунил багьри, лахъ хьуну бур 0,6 процентрал, щалла шинал мутталий – 4,4 процентрал. Муния бувсун бур республикалул статистикалул управлениялул сайтрай.

ХIасан Аьдилов
ЛичIину дукиялухсса багьри дукIу декабрьданий лахъ хьуну бур 0,8 процетрал (шинай – 3,5%). Дукиялул дакъамур хъус ххира хьуну дур дукIу декабрьданий 0,5% (шинай – 6,1%) . ХIаллихшинну ххира хьуну дур декабрьданий 0,2 % (шинай – 4,6%).
ДукIу декабрьданий, таман­сса ххира хьуну дур ахъулсса ва ахънилсса. Помидорду ххира хьуну дур 28% ва нисварти – 23,2% къюмай тIутIи – 6,9%. Мура чIумал пуртихал кьювкьуну бур 4,3%, лимон – 3,4%, къур – 2,7%. ДикIул продуктирдавату декабрьданий яла ххира хьумур дур оьлил ттиликI – 8%. Чавахъ ххира хьуну бур дянивну 3,9%. Нис ххира хьуну дур 6,2%, накI – 2%. ХIанттивату ххира хьумур дур шампанское – 4,3% ва жулла коньяк – 3,8%.
ДукIу декабрьданий ххира хьуну дур кафе-рестораннавусса дукрарду 5,5 – 9,3%. ДукIу ххира хьуну бур мукунма ккунук­ру 2,5%. Мура чIумал кьюркьуну дур пархтIутIул аьгъушиву – 3,4%, качарданул писукI – 1,8%.
ДукIу декабрьданий янна ва усру ххира хьуну дур 2,1-3,3%. Дизельданул ччуччия ххира хьуну дур 1,4%, машинарттал бензин – 0,4%.
ХIаллихшиннавату декабрьданий 13,6% ххира хьуссар скорый поездрал плацкарт вагонналувусса кIану ва 11,1% — купейный вагондалуву.