Ларгсса алхIат кьини МахIачкъалаллал бакIчи Муса Мусаев ивунни Байбулатова №28-нний лахъкъатри буллалисса кIанайн. Шикку буллай бур 12 зивулийсса 455 квартира бусса къатри. Шивунгу чIал къавхьуну бизан бувантIиссар духсса, лекьан хIадурсса къатравусса халкь.

З. АьбдурахIманова
ХIакьинунин къатри сайки бувну чулухун буккавай бур. ЛирчIун дур цаппара вив дувансса, ттукIрал ххаллу, щинал бургъурду, канализация дуцинсса давуртту. БакIчи цува шикку нанисса давурттал ялув авцIуну ур. Ванал къатрал давур­ттал ялувсса жаваблувсса зузалтран дакIнийн бувтунни декабрьданул ахирданийннин циняр давуртту къуртал дурну, къатри дузал буван аьркиншиву.
Шивун бизантIиссар 10-12 квадрат къатлуву диркIсса ва цукунчIавсса хIаллихшиннарду къадиркIсса къатраву яхъанай бивкIсса МахIачкъалаллал халкь. ЦIусса къатраву ца къатта бу­сса квартиралул дусса дур 35 квадрат. ЦIуми къатраву бусса бур ца, кIива ва шанма къатта бусса квартирарду. Шикку ттигу бувантIиссар оьрчIансса 500 кIану бусса детский сад, фитнес-центр, хъунмасса супермаркет ва поликлиника.