ХIакьинусса кьини жула билаятрай Аьрасатнал Пенсионертурал союз дур, миллион ва бачIи агьалинал бухлахисса, ца яла хъуннамур ва чялишну зузисса идара. Аьрасатнал Пенсионертурал союзрал кьюкьраву бур хIатта 80 шинал оьрмулува ливчуссагу пенсионертал.
Щалагу билаятрал регионная Москавлив Аьрасатнал Пенсионертурал союзрал VIII съездрайн бувкIунни 130-нния ливчусса делегатътал.
И. Саидова
Съездрал давриву гьуртту хьунни АьФ-лул Дунияллул халкьуннал иширттал федерациялул советрал комитетрал председатель Константин Косачев, Аьрасатнал Пенсиярттал фондрал правлениялул председательнал хъиривчу Александр Куртин, пенсиярттал фондирттащал зузисса «Почта банка» къуллугърал каялувчи Зюгаев Александр, пенсиярттал союзирттал отделениярттал каялувчитал ва чIявусса цаймигу бусравсса хъамал.
Гьашинусса Аьрасатнал Пенсионертурал союзрал съездрай цалчин гьурттушинна дунни Чехнал ва Сербиянал чулухасса делегациярдал. Чехнал республикалул Пенсионертурал союзрал председатель Ольдрих Поспишил ва Сербиянал Пенсионертурал профсоюзирттал союзрал делегациялул хъунама Милорад Вуясинович бакIчисса вакилтурал мурад бия пенсионертурал дянивсса дусшиврийсса ва хIала-гьурттушиврийсса арарду цIакь дуллалисса кьутIирду чичинсса.
Дагъусттаннал региондалия Аьрасатнал Пенсионертурал союзрал VIII Съездрай гьурттушинна дунни ва съездрал даву дачин дурну президиумраву ия Дагъусттаннал Пенсионертурал союзрал председатель МахIаммадов АьбдурахIман Кьурбанович.
Съездрал гьанусса уставрайн бувну, 4 шинай цал бувчIлай бия Пенсионертурал союзрал агьаммур правлениялул цIусса президиум. Аьрасатнал Пенсионертурал союзрал каялувчи Игорь Корнеев бакIчисса 20 инсанная сакин бувсса президиумравун цIуницIакулгу увчIунни АьбдурахIман МахIаммадов. Пенсионертурал Союзрал председательну ва съездрайгу шамилчин увчIунни Валерий Рязанский.
Аьрасатнал Пенсионертурал союзрал VIII-мур Съездрай ххал бигьлагьисса масъалартту бия билаятрайсса пенсионертурал ялапаршиндаран, миннал оьрмулул шартIру, ахIвал-хIал лавай баврин, Аьрасатнал пенсионертурал оьрмурду лахъи баву мурадрайсса ххуллу-чаранну лякъаврин, бугьарасса инсантурал цIанакулсса оьрмулуву бугьлагьисса кIанттурдан ва дунияллул халкьуннал даражалий пенсионертурал суккушиннардал Аьрасатнал имидж хъинчулий даххана давриву бугьлагьисса кIанттурдан ва цаймигу масъаларттан хас бувсса.
Мукунма съездрай ххал бигьлагьисса агьамсса масъала бия Аьрасатнал Пенсионертурал союзрал председатель цIуницIа увчIинсса, Пенсионертурал союзрал уставраву дахханашивуртту дансса ва 4 шинал дянив Пенсионертурал союзирттал дурсса даврил хIасиллу дуллалисса ва миннун кьимат бишлашисса.
Съездрал даву дайдихьлай, Аьрасатнал Президент Владимир Путиннул чулуха пенсионертал барча буллалисса адрес дурккуна Аьрасатнал Пенсионертурал союзрал председатель, Социал политикалул иширтталсса буллалисса Федерациялул Советрал председатель Валерий Рязанскийл. Мукунма пенсионертал барча буллалисса тамансса адресру дия АьФ-лул министерствардал, ведомствардал, областирдал губернатортурал чулухассагу.
Пенсионертурал союзирттал дуллалисса агьамсса даврин лавайсса кьимат бишлашисса ихтилат бунни Александр Куртиннул.
Ванал бувсунни Аьрасатнал Пенсионный фондрал мудангу чялишсса гьурттушинна дуллай бушиву пенсионертурал союзирттал дуллалисса давурттал чIарав бацIлай.
Съездрай чил билаятирттаясса хъамал бушивугу хIисавравун лавсун, ихтилат бувна Константин Косачевлул.
— На дакIнийхтуну ххари хьура ттуйнма съездрай гьурттушинна дан оьвкукун. Гьашину ва съездрай чил билаятирттаясса делегациярдал гьурттушинна даву му хъинну агьамсса ишри. ХIасил мунийну съездрал даражагу хъанай бур дунияллул халкьуннал даражалул лагрулийсса. Зу зула хьхьичI бивхьусса масъалартту лайкьсса даражалий биттур буллай буру ва зу дуллалисса давурттал хъуннасса агьамшиву дуссар хIатта дунияллул политикалул иширттавугума, — увкунни К. Косачевлул.
Косачевлул гьарта-гьарзану бувсунни чил билаятирттайсса пенсионертурал жяматийсса идарарттал даврил опытраягу.
Пенсионертурал союзирттал даврил опытрая бусласисса ихтилатру бунни Чехнал ва Сербиянал делегациярдал вакилтурал. Съездрал даву дайдишин хьхьичI дазул кьатIатусса хъамал кIул хьунни Москавуллал шагьрулул Пенсионертурал союзрал отделениялул даврищал.
Пенсионертурал союзрал агьаммур правлениялул съездрай чил билаятирттаясса кIивагу делегациялул вакилтуращал чирчунни дусшиврийсса ва хIала-гьурттушиврийсса меморандум.
Хъирив ихтилат бунни Зюгаев Александрдул.
— ДакIнийхтуну барча буллай ура ирглийсса VIII съездращал ва кIицI лаган ччай ура зу дуллалисса даврил агьамшиву хъинну хъуннасса душиву. КутIану бусан ччай ура ва съездрайн лавсун увкIсса ттула мурадрая. «Почта Банкрал» даврил агьаммур мурад хъанахъиссар бугьарасса оьрмулувун бувхсса инсантуран Аьрасатнал Федерациялийсса цинярда финансирттал чулухасса куклушиннарду ишла дан лахьхьин баву. Ва давриву, пенсионертуращал зий байбивхьуну, жу цалчинсса шаттирду ласлай буру. Сберегательный банкрал структурарду дакъасса кIанттурдайсса пенсионертураща «Почта Банкрал» кумаграйну бюхъантIиссар финансирттал куклушиннарду ишла дуллан. Ванийну жула пенсионертуран бигьа хьунтIиссар цала ичIува буна аьркинсса мурад щаллу буллан, — увкунни А. Зюгаевлул.
Пенсионный фондрал дирекциялул махъ буллунни ва масъала дузрайн буккан баврил ялув бацIансса.
Хъамаллурал ихтилатирттая махъ съездрал делегатътурал бувчIунни Пенсионертурал союзрал агьаммур правление, мунил президиум ва ревизиялул комиссия. Аьрасатнал пенсионертурал агьаммур правлениялул президиумрал председатель Валерий Рязанскийл бувсунни 4 шинал лажиндарай дурсса даврил хIасиллая.
— Пенсионертурал ва бугьара хьусса инсантурал цIуллу-сагъшиву дуруччаврия, миннан лайкьсса оьрму бутансса шартIру дузал даврия хъар хъанахъиссар билаятрал бучIантIимур. Мунияту жу хIарачат буллай буру вайннал буруккинтту, масъалартту ПаччахIлугърал властьрал кумаграйну дузал буллан. Федерал ва регионал даражалийсса властирдал кумаграйну вайннал масъалартту дузал баву мурадрай, жу хIарачат буллай буру Пенсионертурал союзирттал каялувчитал ми органнавун бувчIин. Мукунма чIарав бацIлай буру областирдал ва регионнал парламентирттавун Союзрал чулухасса депутатътал бувчIин. Вай органнавун жула каялувчитал бувчIаврийну хъунмасса кумаг хъанай бур пенсионертурал масъалартту паччахIлугърал властьрал кумаграйну дузал буллан.
ПаччахIлугърал властьращал дахIаву дуну зузаву му жул даврил ца яла агьаммур бутIар.
ДакIнийн бутан, уттигъанну Липецк шагьрулий АьФ-лул ХIукуматрал Председатель Дмитрий Медведевлущал хьусса хьунабакьаву. На рязийну ливчIунна ва хьунабакьаврийн хъинну хIадур хьуну бувкIсса жула союзирттал каялувчитурая. Вайннал цала масъаларттая балжину бувсуна ва цIухху-бусуртту бувна Председательнахь.
ХIакьинусса кьини Пенсионертурал союзирттал дуллалисса даврил хIат-хIисав дакъар.
Гьашинусса съездрай Аьрасатнал Пенсионертурал союзравун духлахисса 84 организациялува гьуртту хьунни 71 региондалиясса отделенияртту.
Союзирттал гихуннайсса даврил агьамми планну хъанахъиссар, хьхьичIра-хьхьичI, даврил технологиярттал сакиншинна даву.
КIилчин, жува зий бивкIсса шартIирдай бацIаву дакъа гихунмайгу чялишну зун. Шиккугу кIицI лаганна союзирттал буллалисса чемпионатирттай пенсионертуран кIанттай профессионалталгу гьуртту хъанахьисса кIанттурду хIисав хьушиву. ЦукунчIав мукун бикIан къабучIиссар. Му бакъар жула мурад. Жул мурад – бугьарасса инсантуран цIуллу-цIакьсса оьрму бутансса чаранну сакин баву ва лякъавур. Жура дуллалисса даврил даража лавай баву мурадрай ишла буллан аьркинссар чил билаятирттал Пенсионертурал союзирттал даврил опыт.
КIицI лаганна грантирдал хIакъиравусса масъалагу. Пенсионертурал чулухасса цIу-цIусса проектру, инициативарду аьлтту даву дакъассагу, аьркинссар грантирдащал тIайлану зун лахьхьингу ва ми ккаккан дурсса куццуй ишла дуллан.
Жула даврил бюхъугу, даражагу тIайла буллалиссару бугьарасса инсантурал оьрмулул шартIру ххуй даву, миннан цIуллу-сагъсса оьрму дузал баву мурадрай, — увкунни Валерий Рязанскийл.
Съездрал даврил лагрулий Валерий Рязанскийл жавабру дуллунни пенсионертурал буллалисса суаллахьхьун. Регионнаясса отделениярттал делегатътурал ихтилатру бувну махъ байбивхьунни жура-журасса конкурсирдаву ххув хьуминнан бахшишру дуллай.
Конкурсрай, Аьрасатнал Пенсионертурал союзрал регионнал отделениярттаву яла хьхьичIунмурну хIисав дурну, цалчинсса кIану бувгьунни Дагъусттаннал Пенсионертурал союзрал отделениялул. Му наградагу тапшур дунни Дагъусттаннал Пенсионертурал Союзрал председатель АьбдурахIман МахIаммадовлуйн. Ванал цала ихтилатраву кIицI лавгунни Дагъусттаннал Пенсионертурал союзрал тамансса давурттив дуршиву. Ва отделениялий сакин бунни бугьарасса инсантуран компьютерданий зун лахьхьин буллалисса уквасса курсру. Вай курсирдал кумаграйну пенсионертуран лахьхьин бунни интернетрал кумаграйну жура-журасса куклушиннарду ишла дуллан. Дагъусттаннал Пенсионертурал союзрал дурххусса паччахIлугърал грантрал лагрулий, Новосибирскалий хьусса компьютердал кIулшивурттал чемпионатрай гьуртту хьуссар вай курсирдайн занай бивкIсса цаппарасса пенсионертал.
Мукунма гьашину Дагъусттаннал Пенсионертурал союзрал члентал гьуртту хьуссар Аьрасатнал Пенсионертурал союзрал Курский областьрай бувсса «Битва хоров» тIисса чемпионатрай ва Тульский областьрай хьусса спортрал соревнованиярттай. Вайннал даврил агьаммур мурад – бугьараминнал оьрмулуха ва миннал къайгъурдаха аякьа даву дур. 84 региондалиясса отделенияртту духлахисса Аьрасатнал Пенсионертурал союзраву Дагъусттаннал пенсионертурал союзрал даву хьхьичI ххуттай ккаккаву му агьамсса затри.
Аьрасатнал Пенсионертурал союзрал VIII Съездрал давриву гьуртту хьунни, ихтилатру бунни хъунисса хъамаллурал ва мунил даву ларгунни лавайсса даражалий.
Ахирданий цинявппагу делегатътал хьунабавкьунни съезд къуртал дуллалисса тяхъасса мажлисрай.
Аьрасатнал Пенсионертурал союз сакин дурну дур 20-хъул шиннардил хьхьичI. Союз сакин дурссар бугьарасса инсантурал оьрмулуву хьунабакьлакьисса масъалартту щаллу баву, миннал буруччаву мурадрай.
ЦIанасса чIумал Союзрал хьхьичIххуттай бивхьусса масъалартту бур пенсионертурал дянив спартакиадартту, шахматрал турнирду, компьютерданий зун кIулшиву, «Хордал бяст-ччаллу» ххал бигьлагьисса чемпионатру баву.
Пенсионертурал дянив дуллалисса турнирду, спартакиадартту, конкурсру, цинярдагу мероприятияртту бугьарасса инсантуран мюнпат бусса дур. Укунсса мероприятиярттайну бугьарасса инсантал кIул хъанай бур, хIала бухлай, тяхъа-таза буклай бур кувннащал кув, дакъар вайннан бизар хъанансса чIун.
