Ттун, нава чIивисса чIумалва шяравунал буслай, шяраву хъанахъисса мажлисирттайн, бивкIу-буккурдайн шагьрулия укIлай ккаккайва Аьлиев МахIаммад Кьурбанович.
ХIурмат лавайну икIайва шяравусса арамтурал ва жагьи-жугьултрал дянивгу. Бусласимур лаласайсса, лакрал фольклор, литература ххирасса ттунгу цал ххишала вичIи кIюла дуллан, ванал цайминнахь бусласимур вив бихьлан ччан бикIайва.

Яла, нава «Илчи» кказитрай зун бивкIукун, ттун МахIаммад Кьурбанович хъиннува ххуйну кIул хьуна, хIайран хъанай бикIайссияв ванал экьи най таржума дурсса, дуккин бигьа­сса макьаларттай. Ихтилатрангу МахIаммад, аьпа биву, чIяву шайсса, лагайссания кабинетрава учинсса къаикIайвача, уттигу чансса лахъи лагайссания, ци бунугу аькьлу-кIулшиврул куртIсса бусайссания тIисса икIайва, бусласимунихгу личIлулну вичIи дишайва лагма-ялттунал. Цахьва цичIав цIуххирчагу, ттуяту гьаннав гьанттайн къабияннав куну бакъача, кIукIлуну, гьарзат бувчIин бувну бусайва. Аьй-бювкьугу къаччан къабикIанну дувайва. Махъсса редакциялул зузалтгу хIарачат буллан бикIайва МахIаммадлул кунна экьи най, щинтану таржумар­тту дуллан.
Инсаншиврул чулуха Ма­хIаммад ия дакI хъинсса, лахъсса чIу къабайсса, жагьилми аьдилсса ххуллийн кIункIу бан цащава шайсса хIарачат буллалисса. Му къашавай даврийн къаукIлакIисса чIумал жун, зузалтран, му даврий акъашиву га цIана кIул хъанан бикIайва. ЦIухху-бусу бансса наставник чIарав акъаний, цивппагу пик­рирдавун лаглан бикIайва таржумарттал ялув. Явара, цил багьайкунсса, инсаннан дюххан­сса таржума дуллан къабигьа­ссар, диялсса бакIцIуцIаву дан аьркинссар, хаснура цIанасса чIумал, лакку мазрайсса махъру хъамабитлай, оьрус мазрал махъру хIала бувхсса заманнай, вай ци махърур тIий лак аьраттал буклакисса заманнай. МахIаммадлул таржумарттал лу «Дуниял, дуниял…» канил бувгьукун, на букки, буклай айивхьукун, маацIара, гихунмай ци бурив ххал бува тIисса, кIукIлуну, бигьану, бюхханну чивчусса, куртIсса мяъналул лу бур. Ванивасса, АхIмадхан Абу-Бакардул чивчусса «КIяласса сайгак» тIисса повестьрава­сса парчри бищунну «Илчи» кказитрал адабиятрал лажинтирттайгу, зувагу нахIала буван МахIаммадлул дурсса таржумарттая. Ва луттиравусса цинярдагу таржумарттал зун ххишала бакъа гъира-шавкь рутантIиссар лакку мазрах, цал ххишала ххира хьунтIиссар зулва ниттил маз, махIаттал хъанантIиссару бигьану, экьи най чирчусса куртIсса таржумарттай. Вай дакIнийн бичавуртту дуллай буру жуна тачIаввагу хъамакъаитайсса Аьли­ев МахIаммад Кьурбаннул арс ниттил увну 95 шинал юбилей дакIнийн дутлай, ганалгу бунагьирттал аьпа баннав тIий.
МахIаммад Кьурбановичлуя чичинсса чIявусса бур: дяъвилул ветеран хIисаврай, таржумачи хIисаврай, ххуйсса муаьл­лим хIисаврай, шеърирдал автор хIисаврай, ахиргу лакрал циняв шаэртурал дус-ихтивар хIисаврай. Амма махъру мяъна дусса, кутIасса, хIинча лахъисса хъинссарча, нагу, чичин чIявусса буна дакIниву, вайннуй гьашиву данна цалсса. Вил бунагьирттал аьпа баннав, МахIаммад Кьурбанович! Ина алжаннул ххари аннав.
«Илчи» кказитрай вищал архIал зий бивкIсса редакциялул зузалтран ина тачIав хъамакъаитайссара, мудангу дакIниву, чичаймуниву уссара.
Загьрани Аьбдуллаева