Декабрь зурул 27-нний МахIачкъалалий шадлугърал даражалий тIивтIунни Республикалул Спортрал ва физкультуралул министерствалул цIусса идара. Министерствалунсса цIусса къат­ри бунни «Труд» стадиондалучIа. Ва идаралул цалчинмур зивулий бур столовый ва аьркинсса кьай-кьуй дишин ккаккан бувсса къатри, кIилчинмур зивулий бишин най бур спортрал тарихрал музей, шанна зиву ккаккан дурну дур министерствалул зузалтрансса кабинетирттан, ялувра-ялувсса кIира зивулийгу бур гостиницалун ккаккан бувсса къатри.

И. Саидова
Республикалул ХIукуматрал председатель Аьбдуссамад ХIа­мидовлул кIицI лавгунни Минспортрансса идара буллай байбивхьушиву 2013 шинал ва цурда объектгу духлахишиву хьхьичIава тIивтIусса «Труд» стадиондалул комплексравун.
— Республикалул БакIчинал, Дагъусттаннал ХIукуматрал ва ттула чулуха барча буллай ура хIакьину ва агьамсса даву дузрайн дуккан дан бюхъаврищал. Да­гъусттаннал физкультуралул ва спортрал цIуну бувсса идаралул къатри дузал баврийну щаллу хъанахъиссар «Труд» стадиондалул щалва комплекс. Жунма цинявннан дакIнийсса куццуй, ца­ппара шиннардил хьхьичI ва аьрщарай сайки цичIар дакъассия, цуппа стадионгу буссия хъинну лащинсса тагьарданий. Шанна шинал лажиндарай цимурца ши­ккусса цIудуккан дурну махъ, стадиондалийн занан бивкIссар спорт ххирами. Му бакъассагу, шикку тIивтIуссар волейболданул центр, республикалул ГТО кьамул дайсса центр. ХIакьину тIурча Спортрал министерствалун хьунни ххаллил­сса, цIусса къатри, — увккунни Аьбдуссамад ХIамидовлул.
Мукунма премьер-министрнал бувсунни махъсса 3 шинал мутталий республикалий 100-нния лирчусса спортрал объектру дуршиву.
— Жулва бурж хъанахъиссар рес­публикалий жагьилтуран спортрахун багьансса шартIру дузал даву, цанчирча жучIава чIявусса буну тIий республикалул ва билаят_рал цIа дунияллийх машгьур дуллалисса, гьунар бусса жагьилтал. Масалдаран, уттигъанну цинявн­нан пахру бансса иш хьунни Рио-де-Жанейролий хьусса олимпий тIуркIурдай жула дагъусттанлув Аьбдурашид Садуллаевлул ларсъсса бюхттулсса ххувшаву, — увкунни ХIамидовлул.
Цала ихтилатраву МахIачкъала шагьрулул хъунама Муса Мусаевлул кIицI лавгунни республикалул хъун шагьрулий 300 азара инсан ушиву чялишну спортрахун агьсса ва «Труд» стадион мудан инсантурал бувцIуну бикIайшиву. «КIулшивуртту ласаврийну, спорт­рахун багьаврийну ва ларайсса мяърипат дусса инсаннащар оьр­мулуву хьхьичIунсса кIану бугьан бюхъантIисса. Республикалул БакIчину Рамазан АьбдуллатIипов увкIун махъ, агьалинал вай арардахсса бургаву ххуй чулиннай да­ххана хьунни. ХIукуматрал Председатель Аьбдуссамад ХIамидовлул цала аякьалувун лавсунни ца­ппарасса социал агьамшиву ду­сса объектру. Гьашину Республикалул Спортрал министерствалул 80 шинал юбилейгур. Утти юбилейрал шинал вай бизан най бур ххаллилсса цIусса къатравун. Вания тихунмайгу республикалий дуллантIиссар цикссагу объектру. ЦIана республикалий бур 14 муниципал спортшкола, чIал къавхьуну ца уттигу тIитIинтIиссар, — увкунни Муса Мусаевлул.
Ихтилатирттая махъ хъамаллурал ххал бивгьунни министерствалунсса цIуну бувсса ххаллил­сса къатри.