МахIачкъалалив хIурматрай, бусравну кьамул унни лакрал цIа дурксса греко-римуллал журалий лачIун буккаврил Дагъусттаннаясса цалчинма чемпион Рамазан Абачараев.
ХIасан Аьдилов
Рамазан лачIун уклай ивкIссар Аьрасатнал цачIундур командалуву 80 килорал кIушиврий ва ларсъссар мусил медаль.
МахIачкъалаллал аэропортрай Рамазан хьунаакьин бувкIун бия шяравучувтал, уссурссу, гъан-маччами, дустал ва чIявусса лак. Миннал машинарттай дия Рамазаннул суратру.
Р.Абачараев хьунаакьин бувкIминнавух бия МахIачкъалаллал Кировлул цIанийсса райондалул бакIчи СалихI Сагидов, ДР-лул физкультуралул ва спортрал министрнал хъиривчу, олимпиадалул чемпион ХIайдарбаг ХIайдарбагов, боксрал дунияллул чемпион Султан Ибрагьимов ва цаймигу цIа дурксса спортсментал.
Яла кIул хьунни «Уйташ» аэропортрай лирксса самолетрай Дагъусттаннайн бувкIун бивкIшиву кIия дунияллул чемпион: греко-римуллал лачIунбуккаврил журалул чемпион Рамазан Абачараев ва чIава жагьилтурал дянив (юниоры) профессионалтурал боксрал дунияллул чемпион МахIаммад Кьурбанов.
МахIачкъалаллал Кировлул цIанийсса райондалул хъунаманал Рамазан Абачараевлухь авравгу куну, ххувшаву барчагу дурну, чIа увкунни уттиния тихуннайгу хьхьичIуннайшивуртту.
ЦIа дурксса Дагъусттаннал боксер Султан Ибрагьимовлул Рамазан Абачараевлухь ххувшаву барчагу увкуну, бувсунни Рамазан Ухссавнил Ккавкказнаву цалчинма хъанай ушиву греко-римуллал лачIунбуккаврил журалул Аьрасатнал мусил медаль ларсъсса лачIунукку.
Буттал Ватандалийн увкIукун Рамазан шадлугърай кьамул аврияр ххишала, СалихI Сагидовлул ганан пишкаш дунни цIусса Тойота «Камри» машиналул кIулли. Яла бунни ххувшаву ларсманал цIа бюхттул даврин хасъсса банкет, тикку чIявуминнал лавхъунни цIуну хьусса дунияллул чемпион барча уллалисса махъру.
Жу бакIрайн ласлай буру цIусса шинаву лакрал дунияллул чемпионнащал хьунабавкьуну, ганая гьарта-гьарзану чичин.
