Декабрьданул 2-нний Дагъусттаннал БакIчи Рамазан АьбдуллатIипов Пятигорскалий гьуртту хьунни «Аьрасатнал Ккавкказ» тIисса Дунияллул халкьуннал политологиялул форумрай.

Аьдатрайн бувну, дурккунни билаятрал хьхьичIунсса политикалул ишккаккултрал аьла-ссаламрал адресру. Аьрасатнал Федерациялул ХIукуматрал Председатель Дмитрий Медведевлул цIаниясса адрес дурккунни миллатирттал иширттал Федерал агентствалул каялувчи Игорь Бариновлул.
Аьрасатнал Президентнал Ухссавнил Ккавкказуллал федерал округрайсса вакил Олег Белавенцевлул цIаниясса аьла-ссаламрал адрес дурккунни ганал хъиривчу Максим Владимировлул.
Форумрал планерсса заседаниялий ихтилат бунни Аьра­сатнал Ухссавнил Ккавкказуллал иширттал министр Лев Кузнецовлул. Ганал увкусса ку­ццуй, миллатирттал дянив­сса арарду дуруччаву хъар хьун аьркинссар цIакьсса социал-экономикалул гьанулийн. Ккав­кказ – му хьхьичIуннайшиврул территорияр. Му лозунг бакъарча, му буниялашивур.
Га гьану дузал бан кумагну хьунтIиссар 2025 шинайннин СКФО хьхьичIунмай баврин хасъсса ПаччахIлугърал программа.
2017 шинал регионнал подпрограммартту мюнпатну щаллу даврийну бюхъантIиссар Ух­ссавнил Ккавкказуллал федерал округрансса арцу гьарза хьун дуван хъиривми шиннардин. Мунияту аьркинссар ккаккан дуван бунияласса хIасиллу.
ЦIанасса ппурттуву, агарда щала билаятрай промышленностьрал производствалул лябу­кку 100% бухьурча, Ккавкказнаву 9 зуруй лябукку хьуну бур 107%. Шяраваллил хозяствалуву – агарда щала билаятрай лябукку хьуну бухьурча 103%, Ккавкказнаву хьуну бур – 105,4%.
Министрнал тIимунийн бувну, Ухссавнил Ккавкказуллал чIяруми проектирдал дур стратегиялул мяъна ва миннул агьамшиву дур округрангу, Аьрасатнангу.
Миллатирттал иширттал федерал агентствалул каялувчи Игорь Бариновлул бувсъсса куццуй, Агентствалул ляличIисса къулагъас дуллай дур Ккавкказуллал регионнайсса давурттах. Гьашину СКФО-равун буххай­сса арулвагу субъектран федерал бюджетравату арцуйнусса кумаг бувссар Аьрасатнал нациялул цашиву цIакь даврил регионнал программарттан. Субсидиярттал аьмсса лагру хьуссар 50,5 млн. къуруш.
Игорь Бариновлул бувсунни Ккавкказнавусса захI­матнийн багьсса масъаларттал хIакъиравугу. Ганал мукунма гьартану бувсунни миллатирттал федерал агентствалул хIадур дурну душиву «Реализация государственной национальной политики» тIисса паччахIлугърал программа. Га программалуву дур личIи-личIисса темарду, миннувасса ца дур «Миллатирттал ва диннал гьанулийсса экстремистшиврул профилактика» тIисса.
«Ва ПаччахIлугърал программа яла гъансса чIумуву ласунтIиссар Аьрасатнал ХIуку­матрайн ва ПаччахIлугърал Думалуву кьамул дан. Га документ кьамул даврийну кумаг хьунтIиссар паччахIлугърал миллатирттал политика дузрайн ду­ккан даврин.
Форумрай ихтилат бунни Дагъусттаннал БакIчи Рамазан АьбдуллатIиповлул. Ганал бувсмунийн бувну, Аьрасатнаву ялапар хъанай бур 100-я ливчусса миллатру, мунийн бувну Аьрасатнан миллатирттал масъалалул мяъна лапра хъуннассар.
Жулва мурадирттава­сса ца хъанахъиссар общест­во хьхьи­чIуннай шаву ва Аьра­сатнал нация сакин шаву. «Республикалий миллатирттал дянивсса арарду цалий дарцIуну дур», — увкунни Рамазан АьбдуллатIиповлул. Форумрай ихтилат бунни Аьра­сатнавусса Азирбижаннал на­ционально-культурная автономиялул президент Мегьрибан Садыговал.
Ихтилатру къуртал хьуну махъ форум лахъи ларгунни дискуссиярттал площадкарттай.