Декабрьданул 5-нний Дагъусттаннал БакIчи Рамазан Аьб­дуллатIипов хьунаавкьунни ДР-лул виваллил иширттал министрнал хъиривчу – МВД-лул полицалул хъунама Сергей Карповлущал ва ГИБДД-лул Управлениялул цIусса хъунама Евгений Нечаевлущал.

Ххал бигьлагьисса масъаларттавасса ца бия дагъус­ттанлувтурал ххуллул кьяйдарду къадуруччаврил ва мунияту чIявусса ххуллурдал апатIру хъанай бушиврул масъала.
«Ххуллийх бачаврил кьяйдарду – культуралул лишанни. ХIадур дуван аьркинссар ххуллул апатIру чан бансса давурттал программа, давуртту дуллан аьркинссар школардаву ва вузирдаву. Тагьар ххуй дансса давур­ттугу дуллай, муданна дахханашивурттал мониторинг дуллан аьркинссар», — увкунни Рамазан АьбдуллатIиповлул.
Сергей Карповлул региондалул хъунаманахь бувсунни ихтиярду дуруччай органнал системалуву коррупциялийн къаршисса давуртту дуллалаврил хIакъираву. Ганал ккаккан унни ГИБДД-лул цIусса хъунама ва бувсунни Евгений Нечаев ивтун махъ хъинчулийсса дахханашивуртту хъанай душиву. «Га чялишну талан ивкIунни шагьрулий хъанахъисса пробкардащал, машинарттал пюрунтру лухIи-цIан буллалисса шофертуращал. Гьаман ва увкIун махъ ххишала хьунни ххуллул кьяйдарду дуруччаврил ялув бацIавуртту. ЦIанасса ппурттуву ведомствалий кIул буллай бур ххуллул апатIру чIявуну чув хъанай бурив, мукунма ци чIумал хъанай бурив.
Хъин чулиннай даххана хьунни ГАИ-лул структура, мунил зузалтрал пиша кIулшиврул даража лавай хъанай бур», — увкунни Сергей Карповлул.
ДР-лул ХIукуматрал вице-премьер Рамазан Жяъпаровлул бувсмунийн бувну, ххуллул апатIирттай инсантал литIа­вурттал ккаккияртту чан хьуну дур: «Агарда 2014 шинал 100 азара инсаннан хIисавну 19 инсан ивкIуну ивкIхьурча, 2015 шинал ивкIуну ур 15 инсан, гьашину – 13 инсан. Ми ккаккияртту ларсун дур ххуллурдайх заназаврил мюхчаншиву щаллу даврил рес­публикалул программалува».
Хьунабакьаврил хIасиллу дуллай, Рамазан АьбдуллатIиповлул увкунни: «Жул мурад бур Виваллил иширттал министерствалул даву ххуй шаву. Ттул пикрилий, тIайласса даву дурссар му къуллугърай цалва пиша ххуйну кIулсса, бажар бусса инсан итаву. Жу жула чулуха шайсса кумаг булланну мунал давриву».