Декабрьданул 1-нний Дагъусттаннал БакIчи Рамазан Аьб­дуллатIипов гьуртту хьунни АьФ-лул Федерал Собраниялий Аьрасатнал Президентнал Рисала дуккаврил церемониялий.

ПаччахIлугърал БакIчинал хъуннасса къулагъас дунни экономикалух, социал масъаларттах ва виваллил политикалух.
Владимир Путиннул бувсмунийн бувну, жулла щалла политикалул мяъна – му инсантал буруччавур, Аьрасатнал хъунмур аваданшиву хIисаврай, инсаншиврул капитал гьарза давур. Мунияту жува хIарачат буллалиссару аьдатравун багьсса ххазинардацIун, кулпатрацIун, демографиялул программарттацIун кабакьин, экология ххуй дуван, инсантурал цIуллушиву дуруччин, ду­ккаву ва культура хьхьичIуннай дуван.
«Жулва билаятрай оьрчIру дуклан аьркинссар къулайшивуртту дусса ттизаманнул школардаву, мунияту жу ттинияр шихунмайгу дузал дулланну школарду цIу буккан баврил программартту. ЖучIава бикIан къааьркинссар бух хьуну, лекьлакьисса, укуннасса къулайшивуртту дакъасса школарду. Аьркинни, ахирдангу, школардай 3-мур сменалул масъалагу ца чулийн буккан буван, яла 2-мур сменалулмур масъалагу щаллу булланну. Гьай-гьай, хIарачат буван аьркинссар, учительтурал квалификациялул даража лавай баврил масъалагу щаллу буван. 2016 шиная шиннай дузрайн дуккан дуллантIиссар аьм­сса дуккаврил организациярдай цIусса кIанттурду дузал баврил программа. Га программа хIисавравун ларсун дур щаллу дуван 2016-2025 шиннардий, га щаллу дуван гьар шинал 25 млрд. къуруш ккаккан дурну дур», — увкунни Владимир Путиннул.
Ганалва бувсмунийн бувну, ялун нанисса шинал гьарца региондалийн тIайла дуккантIиссар 20 млрд. къуруш дузалшинналул программалун. Му давривух чялишну хIала духхан аьркинссар Аьрасатнал халкьуннал фронтгу. Аьркинссар мюнпатсса контроль щаллу буван ва хIарачат буван аьркинссар балжисса хIа­силлугу хьун дуван, цанчирча агьали ялугьлай бур ми давур­ттал хIасиллах.
ПаччахIлугърал бакIчинал бувсунни шяраваллил хозяйствалуву лябукку шавриву регионнал бугьлагьисса кIанттурдая: «Ттул пикрилий, регионнал цалла аьркинсса куццуй ишла дуллан аьркинссар АПК-ран кумагрансса федерал субсидияр­тту. Цуксса гьарзану субсидияртту ишла дурну дурив, миксса гьарзану ласаван аьркин­ссар бакIлахъиягу, муксса мюнпат ласлан аьркинссар шяраваллил хозяйствалуву дуллалисса давурттаяту. Зузи дуллан аьркинссар ттининнин ишлану къадиркIсса аьрщив, ишла дуллан аьркинссар хьхьичIуннайсса агротехнологияртту. Яни ишла дурсса луртаннан лайкьсса мюнпатгур ласлан аьркинсса, ми иширттаву регионнал жаваблувшивугу гьарза хьун аьркинссар. Жулва фермертал рынокрайн буклан аьркинссар, хъуннасса къулагъас дикIан аьркинссар сельхозкооперациялуцIун кабакьу буллалаврих. Ми масъалар­ттаха зун аьркинссар Минсельхозгу, Россельхозбанкгу, «Росагролизинггу, мукунма чIиримур ва дянивмур ишбажаранчишиврул корпорациягу. ЯлунчIил жу ганил капитал щаллу данну 13 млрд. къурушрал».
Аьрасатнал Президентнал бувсунни коррупциялущал­сса талатаврил хIакъиравугу. «Махъсса шиннардий къачан­сса хьунни цинявннан баян­сса куццуйсса силисттарду муниципал, регионнал ва федерал даражалул къуллугъчитурал хIакъираву. Амма чIявуми паччахIлугърал къуллугъчитал – марцIсса, духIин дусса инсанталли. Я хъунмасса къуллугърал, я чIярусса дахIавурттал, ягу цIа дуккаврил ххассал къабантIиссар кару чапалсса властьрал вакилтал силистталуща», — увкунни Владимир Путиннул.
Рисалалул ахирданий па­ччахI­­лугърал каялувчи­нал ув­кунни: «Билаятрал ялун бу­чIантIимур так жуйнма хъар­ссар, жулва захI­матрайн ва пагьмулийн, жулла жаваблувшиндарайн ва давур­ттавусса хьхьичIуннайшивурттайн. Жува чара бакъа биянтIиссару жулва мурадирттайн, щаллу банну жулва хьхьичIсса масъалар­тту».
Рисала дурккуну къуртал хьу­сса чIумал, Дагъусттаннал БакIчи Рамазан АьбдуллатIиповлул цалва пикри бувсунни Рисалалул цаппара агьамсса масъаларттал хIакъираву.
«Ва ххуллух Аьрасатнал Президент Владимир Путиннул гьарта-гьарзану бувсунни инсаннал ихтиярдал ва тархъаншивурттал хIакъираву личIи-личIисса бутIраву: экономикалуву, дуккавриву, культуралуву. Рисалалул хъунмур пикри хъанахъиссар гьарзат жуйнна хъаршиврул тезис. Аьркинссар мюнпатну зун ва ишла дуллан дусса циняв луртанну, хаснува регионнай. Ми давурттаву хъунна­сса къулагъас дикIан аьркинссар чIиримур бизнесрах», — увкунни Рамазан АьбдуллатIиповлул.
ХIадур бувссар
ХI. Аьдиловлул