Декабрьданул 13-нний ДР-лул промышленностьрал ва машлул министр Юсуп Умавовлул ва ДР-лул ХIукуматрал вице-премьер ХIасан Идрисовлул Дагъусттаннал БакIчи Рамазан АьбдуллатIиповлухь бувсунни республикалул промышленностьрал тагьарданияту ва ганил ялун дучIансса чIумул бан-битанмунияту.

Юсуп Умавовлул бувсмунийн бувну республикалий 4 шинал мутталий промышленностьрал производствалул лябукку кIилий ххишаласса хьуну бур.
«Гьашину «Дагдизель» завод­рал дуккан даймур гьарза хьуну дур 2,9-лийла, ХIажиевлул цIанийсса заводралсса – 1,6-лийла, «Концерн КЭМЗ» ОАО-ралсса ва «Азимут» ОАО-ралсса – 1,7-лийла. Гьашину январьдания ноябрьданийнин промышленностьрал дуккан дурну ва дарххуну дур 46,5 млрд. къурушрансса хъус. Щаллу бувну бур 331 зузи кIану. Бюджетравун дучIан дурну дур 8 млрд къуруш налогирттал, ми хъанай дур дукIуминнуяр 22,5% ххишаласса», — увкунни министрнал. Юсуп Умавовлул бувсунни ларгсса 4 шинал мутталий региондалий кIийла ххишала хьуну душиву обороналул заказру ва промышленностьрал предприятияртту зий бушиву импортозамещениялуха.
ДР-лул Минпромторграл каялувчинал бувсмунийн бувну, 2016 шинал Дагъусттаннай зун бивкIссар 2 индустриялул парк, цIана тIурча зий бур 5. Ми площадкарттай зий ур 23 резидент, миннал ларсун дур 414 млн. инвестициярдал. Ялун нанисса чIумуву дузал бан най бур уттигу 2 индустриялул парк – Къарабудахкантуллал райондалий ва Дагестанские Огни шагьрулий. 2017 шинал республикалий промышленностьрал производствалул индекс лахъ хьун тIий бур 110%.
ДР-лул БакIчинал увку­сса куццуй, ларай кIицI дурсса кка­ккияртту къаоьккисса дур. Утти­сса тагьарданух буругарча, куртIсса экономикалул кризисрая, производство дацIаврия гъалгъа тIун къабагьанссар. Мукуннасса тагьар дур шяраваллил хозяйствалувугу. Аьркинссар дузалгу дурну, ишакаш дуллан программа «ЦIусса индустриализация» гьарца шагьрулийгу, хIатта хъунисса районнайгу.