Декабрь зурул 15-нний Аьрасатнаву дакIнийн бичайссар чил канища ливтIусса журналистал. Ва кьини кIицI дуллалиссар Журналистурал союзрал 1991 шиная байбивхьуну. Андриана Аьбдуллаева
Даврил уртакьтурал, гъан-маччаминнал, гьалмахтурал дакI­нийн бичай ва кьини дяъвилул иширттаву «кIирисса точкардай» бакъассагу, паракьатсса чIумалгу, тIайлашиврул цIаний, вирттаврал кунна, жанну дуллусса гьунар бу­сса репортертал, суратрищулт, телеоператортал.
Махъсса ацIрахъул шиннардил лажиндарай Аьрасатнаву пишалул бурж бартбигьлай жан дуллуну дур 400-ннийн бивсса журналистурал. Ва кьюкьлуву бур коррупциялийн, къуллугъчитурал тIайладакъашивурттайн къарши бавцIуну жан дуллусса Дагъусттаннал 20 журналистгу. ХIакьинусса кьини, вайксса журналистал оьрмурдацIа бувсса иширттава, дахьра ца тахсиркаршиву ашкара дурну дур. Миккугу так ккулла бивтма лявкъуну ур, заказчиктал кIул бан бувар. Гьар кIанайгу укунсса тахсиркаршивуртту чанну ашкара дуллай бур. Щалагу дунияллий журналистал оьрмулуцIа бувсса ишир­ттал так 8% ашкара бувну бур.
Цала ихтиярду ва мурадру буруччин, журналистурал оьрмурду мюхчан бан цинявппагу журналистуран цачIун хьун, ца ххуллийх бачин, куннал чIарав ку бацIан аьркинну бушиврий бия ихтилатру арвахI кьини Журналистурал къатраву хьусса аьпалул мажлисрай. Ва тIитIлай, ихтилат бунни Да­гъусттаннал Журналистурал союзрал председатель Аьли Камаловлул. Ванал бувсунни декабрь зурул 15-нний Москавлив укунна­сса, чил канища ливтIусса журналистал дакIнийн бичлачисса, батIаву хьушиву ва микку ЮНЕСКО-лул, ООН-лул, Дунияллул ва Европанал Федерациярттал вакилтал гьуртту хьушиву.
— Журналистал оьрмулуцIа баврил хIакъиравусса аваза бувтсса делордал ялув бацIаншиву баян бувай ПаччахIлугърал Думалул, амма ттигу царагу тахсиркаршиву ашкара дурну дакъар, цанчирча миннувух хIалану бур хъунисса къуллугъчитал ва чIярусса арцу. ЦIубутIуй ихтиярду дуруччай органнал баян бувай тахсиркаршиву ххал дигьлай, хъирив лаллай бушиву, халкьгу паракьат шай вайннал тIайламур бацIан баншиврийнсса умудрай. Амма яла силистталун дайшишру дуллалисса чIявусса ишру хъанан бикIай. Уголовный делолул материаллава бяйкьай бардултрал бусласимур, тIайламур ашкара бансса затру. ХIакьинусса кьини респуб­ликалул 19 журналист оьрмулуцIа увсса иширттава, дахьра ца тахсиркаршиву ашкара дурну дур. Журналист Аьбдулмалик Ахмедилов оьрмулуцIа аврил хIакъиравусса дело шанна шинай лахъи ларгунни. Му оьрмулуцIа увсса кIиннан танмихI кьувкьунни – цаннан 10 шинай, цаннан 8 шинай колониялий щябитансса. Умуд бур заказчикталгу лякъинссар тIисса.
Журналист оьрмулуцIа аву – му обществалийн битавур, — увкунни Аьли Камаловлул. Ванал бувсунни чил канил оьрмулуцIа бувсса журналистурал аьпа абад баву мурадрай дуллалисса давурттая. ЦIусса шинал Дагъусттаннай къуллугърал бурж биттур буллай дунияллул личIи-личIисса кIанттурдай оьрмулуцIа хьусса журналистуран дацIан дан тIий бур гьайкал. Му гьайкал цурдагу ЮНЕСКО-лул аякьалулу дикIан тIий дур. Макетгу, документациягу хIадурну дур. Гьайкал дуллай бур Белоруссиянаву, Мос­кавуллал архитекторталгу гьурттуну. Ва дикIан тIий дур 16 метралул лахъшиврийсса, сси къабагьайсса, му­ххая дурсса гьайкал. Гьайкал дацIан дан ва лагма-ялттусса кIанттурду бакьин бан диялсса арцу аьркин дагьлай дур. ХIакьинусса кьинилия тихунмай ми арцу датIин багьлай бур. Аьли Камаловлул бувсунни ва масъалалул хIакъираву цува Дагъусттаннал БакIчи Рамазан АьбдуллатIиповлучIангу лавгшиву, хъунисса дунияллул организациярдайнгу увкшиву. Гьайкалданунсса арцу ратIаву мурадрай дан багьлай бур личIи-личIисса акциярду, телемарафонну.
Ва давривух гьуртту хьияра тIисса чагъарду тIайла бувккун бур Аьрасатнавусса 83-гу Журналистурал союзирттайн.
Баян бавуртту дуллан багьлай бур СМИ-дайхчIин.
— Уттинингу жура жула ко­ллега­хъал, дустурал аьпа абад бан шаймур бувссар. Жула хIара­чатрайну Миллат­рал политикалул, информациялул ва кьатIаллищалсса дахIавурттал министр МахIаммадсалихI Гусаевлул цIа дуллуссар Журналистурал комплексран ва шагьрулул кIичIираваллин, Дагъусттаннал информациялул политикалул ва президентнал пресс-службалул управлениялул хъунама Гьарун Кьурбановлул цIа дуллуссар телевидениялул комплексран ва шагьрулул кIичIираваллин, «Дагъусттан» ПаччахIлугърал телерадиокомпаниялул директор ХIажи Абашиловлул цIа дуллуссар шагьрулул кIичIираваллин. ЦIанагу цинявппа журналистал цачIун хьуну гьайкал дацIан дан хIарачат бан аьркинссар, — увкунни Аьли Камаловлул.
Журналистурал пиша нигьачIаву дусса пиша бушиврия, журналистал кIи бищун къабавцIуну, ца хьуну сукку тIун аьркиншиврия, журналистурал оьрмурду мюхчан баврия, пишалул сий гьаз даврия ихтилатру бунни «Илчи» кказитрал хъунмур редактор Качар ХIусайнаевал, «Новое дело» кказитрал хъунама редактор ХIажимурад Сагитовлул ва м.ц.