МахIанмадмирзал арс Арсен Сулайманов
Вай гьантрай аьпалухьхьун лавгунни Ккурккуллал шяравасса МахIанмадмирзал арс Арсен Сулайманов.
Арсен увну ур 1945 шинал. 1960-ку шинал Ккурккуллал дянивмур даражалул школагу арцул медальданий къуртал бувну, увххун ур Дагъусттаннал университетрал строительный факультетрайн.
Итххявхсса, дуккавриву гьунар бусса Арсен, институтгу ххювардай къуртал бувну, зун ивкIун ур «Даггражданпроект» институтраву. 1965-ку шиная айивхьуну 1992 шинайн бияннин му институтраву отделданул хъунама конструкторну ивкIун ур. Мунияр махъ зий ивкIун ур Дагъусттаннал технический университетраву строительный конструкциярдал кафедралий испытательный лабораториялул заведующийну. Арсен ия цала даву ххуйну кIулсса, лавайсса даражалул пишакар ва жаваблувсса каялувчи. Бусравну икIайва архIал зузиминнан. ЗахIматрал ххуллий чIалачIи дурсса ккаккиярттахлу Арсен лайкь хьуну ур личIи-личIисса наградарттан. Миннувух дур Армениянаву, Чачаннаву аьрщи сукку хьусса чIумал дурсса давурттахлу дуллусса ХIукуматрал грамотартту, дур цIусса конструкцияртту дурну тIий дуллусса медаль. Арсен ия захIматрал ветеран.
Цала кулпатращал Написатлущал ванал тарбия бувну бур ххаллилсса, оьрчIру – 1 арс ва 2 душ. Мигу, ларайсса кIулшивурттугу ларсун, ххуйсса пишакартал хьуну бур.
Арсен ия ичIувагу, кьатIувгу хIал бавкьусса, инсаншиврул бутIа буллусса адамина. Ва аьпалул шаврил кьурчIишиву кIидачIлай, жижара буллай буру кулпатрахь, оьрчIахь, махъсса гъан-маччанахь. Цал рухI хъинний дишиннав, алжаннул ххари аннав.
Ккурккуллал жямат
Жул агьулданул пахруй
Декабрьданул 16-нний ЦIуссаккуллал шяраву увсса Мажидлул арс Мажидов Мухтар дунияллия лавгун шин хъанай дур.
Аьрщи лаллай, дакI лаллай
Къюву хьхьара шайссар тIар,
КъюкIливусса щавурив
ТакIуйгу хъин къахьунссар.
Урттуву тIуркIу тIисса
ТIутIияхха вил оьрму,
Хъирив хъап тIий ливчIунну,
Жу вия махIрум хьуну.
Вил чурххал къалип бусса
Къаралти ххал хьурчагу,
Чурххал базу-базурдайх
Бявкъусса зурзу лагай.
Агь, бавал, кьурчIишиву,
Ина бувцIу кьурттарал,
Исвагьисса вил чурх тти
ХьхьичIа букьлай бакъассар.
Вин шин дуллали кьини,
ЧчатIуй бакъухъ бивхьуну,
Ниттил ва буттал тухум
Ина дакIнийн утланну.
Ас-намусрал бувччу чурх,
ЦIимилун тIитIай кару
Утти тIитIи дакьин да
Му Алжамирал тахлийх.
Вин къабуллусса оьрму
Тти вил арснан булуннав,
Бавал, вил барачатгу
Ххира оьрчIавун гьаннав!
Щалвагу агьлу-авладрал цIанияту нину Зинаида
Хъуннасса кьурчIишивугу кIидачIлай, жижара буллай бура ГьунчIукьатIрал шяраву ттулва чIаххурай яхъанай бивкIсса, хIурмат лавайсса Аьбдуллаев Аминнухь ва Лизахь, душ Аминатлухь, арс Загьидинахь, Анжелал арс-душнихь, ласнахь, Аминнул ссурваврахь, уссихь, цинявппагу гъан-маччанахь, зун цинявннанмагу ххирасса
Анжела
аьпалувух бишаврийн бувну. Анжелал рухI алжаннул ххари даннав, гьав нурданул дуцIиннав. Махънал оьрмурду лахъи баннав. Агьлу-авладрая оьрмулия щакъаливххун цучIав яла къагьаннав. Амин!
ЗучIан биян ччай, биян къавхьусса Исубуттаева (Абачараева) ПатIимат Сапижуллагьлул душ
ХIасаннул душ ХIажиева Аьйша
Тамансса хIаллай цIуцIи шанийгу бивкIун, ахиратравун лавгунни Кьукуннал шяраватусса дяъвилул гьурттучинал Апаннинал кулпат ХIажиева Аьйша.
Ва цуппагу бия дяъвилул ва захIматрал ветеран. Мукьа уссил ца ссу бухьурчагу, чIивиния шинмай захIматраву, колхоз-совхозрал давурттай савсъсса хъамитайпа бия Аьйша. Ва бия гьарцаннащал бавкьусса, хасият ххуйсса, кIини кунмасса инсан. Цила оьрмулуву ванил щищалчIав рагьан дурну, дяниялу зия хьусса иш бакъар. Мунияту ва цинявннангу бусравну бикIайва. Ванин, цила оьрмулуву бувсса захIмат бакъассагу, духIан багьуна чIун дакъа ливтIусса арснал ва душнилгу, шама уссилгу бивкIулул къювурду. Хъунмур душ бивкIуну, шанма оьрчIан нинушиву дан багьссия Аьйшан.
Ци банссар, жущала ччай бунугу, дакIнин ххирами жунма ччиссаксса хIаллай къабитай. Аьйшал бивкIулул пашманшиву кIидачIлай буру оьрчIахь ХIасан-ХIусайннухь, ХIадислухь, Миясатлухь ва махъсса щалагу агьлу-авладрахь. Махънал оьрмурдай барачат бишиннав, Аьйшагу алжаннул ххари баннав. Амин.
Кьукуннал жямат
