Декабрьданул 6-нний М.Горькийл цIанийсса Оьруснал театрдануву «Воспевшие Дагестан» I-сса Республикалул театрдал фестиваль-конкурс лакьлакьисса шадлугъ хьунни. Шиккун ва хьхьуну увкIун ия республикалул БакIчи Р. АьбдуллатIипов ва республикалул министерстварттал ва ведомстварттал каялувчитал, хъамал, театрданул магьирлугърал минахуртал.

З.АьбдурахIманова
ДакIнийн бутан, фестиваль-конкурс най диркIссар жулла республикалий ноябрьданул 19-нния 29-ннин ва вания хьуссар жула культуралул оьрмулуву аьдатравун бутантIисса агьамсса иш.
Ва хьхьунугу шадлугъ тIигу-тIиртIунни фестиваль-конкурсравух гьурттуну бивкIсса ва ванил лауреатътал хьусса театрдал бивхьусса пьесардавасса бутIри ккаккан баврийну. Хъирив сахIналия конкурсрал гьур­ттучитал ва залданувусса тамашачитал барча бувунни ДР-лул ХIукуматрал председательнал хъиривчу Анатолий Карибовлул. Ванал кIицI бувунни, театрдал фестиваль ккалли хъанахъишиву Дагъусттаннал цIадурксса шаэртурал, чичултрал аьпа абад буллали­сса цIадансса иширан. Ва чIурчIав дурунни вания гихуннайгу хъуннасса къулагъас, ургъил буллан аьркиншиву му­къул усттаршиву лахъсса шаэртурал, чичултрал творчествардах, вайннал произведенияртту ва сахIналул магьирлугъ машгьур дуллалаврих.
«Воспевшие Дагестан» фестивальданул агьаммур мурад бивкIссар эксперимент журалий цIу-цIусса формарду , художествалул чаранну лякъинсса. Вай гьантрай Дагъус­ттаннал тамашачиналгу цанма тIивтIуссар машгьурсса шаэртурал творчествардачIансса цIусса , ттинин къабивтсса ххуллурду. Да­гъусттаннал театрдал актертуралгу цал ялагу тасттикь бувссар цивппа хъинну гьунар бусса, личIи-личIисса образру ккаккан дан бюхъайсса ххаллилсса пишакартал бушиву», -увкунни А.Карибовлул.
Мукунма ванал кIицI бувунни, фестивальданул сакиншинначитуралгу лахъсса даражалий биттур бувшиву цайва бивхьуну бивкIсса буржру.
«Фестиваль шадлугърайну лакьаврил­гу Дагъусттаннал драматургиялун тIитIин­тIиссар цIу-цIусса произведенияртту ялун буккан бансса,жулла драматургиялун цIусса оьрму булунтIисса автортурачIансса ххуллурду. Ванил сакиншинначитураву цIакь хьунтIиссар цащава вания гихуннайгу ххуй-ххуйсса проектру щурущи дуван бюхъайшиву ккаккан буллалисса умуд. Фестивальданух бурган аьркинссар гьар чулухалу хIисавравун лавсун: шеърилугърал, музыкалул, хореографиялул, изобразительный магьирлугърал»,-увкунни А.Карибовлул.
Шиккува бусан, республикалул БакIчинал хIукму бивкIссар конкурсраву ххув хьуминнан ва циняв лауреатътуран премияртту дулунсса. Конкурсрал жюрилул хIасиллайн бувну, Культуралул фондравасса арцул премиярттан лайкь хьуну бур ванивух гьуртту хьусса спектакльлу, композицияртту, актертурал тIуркIу.
Жюрилул ххув хьуминнавух кIицI бувунни ХI.ЦIадассал цIанийсса Яруссаннал , А.Къапиевлул цIанийсса Лакрал ва Табасараннал театрду.
Вай бакъасса арцул премиярттан лайкь хьунни М.Горькийл цIанийсса Оьруснал, А-П.Салаватовлул цIанийсса Къумукьнал ва Оь.Батирайл цIанийсса Даргиял театрдал ккаккан дурсса литературно-музыкалул композициярду. Мукунна конкурсрал лауреатътуран цала чулухасса бахшишру ва дипломру буллунни ДР-лул Театрдал деятельтурал ва Чичултрал союзиртталгу.