Декабрь зурул 16-нний МахIачкъалалив, Дусшиврул къатлуву хьунни Ухссавнил Ккавкказуллал динийсса лидертурал 4-мур конгресс «Роль исламских организаций в консолидации российского общества в противодействии идеологии экстремизма и терроризма».

П. Рамазанова
Шикку гьуртту хьунни ХIукуматрал председательнал хъиривчу Рамазан Жяъпаров, республикалул муфтийнал хъиривчу АхIмад Кахаев, шариатрал элмурдал доктор Щайх Мусттапа Диб Аль-Буга, Ккав­кказуллал республикардал муфтийтал, имамтал, жяматийсса ишккаккулт ва студентътал.
«Жува циняв лаласун аьркинссар Аьрасат жулва аьм­сса къатта бушиву. Динийсса идарартту хъуннасса даву дуллай буссар агьалинал дянив аслахIшиву, дакьаву ядаву мурадрай, амма къювусса масъалартту ттигу бур, жагьилтал ва оьрчIру мяърипатрал гьанурду цIакьну тарбия булланшиврул ттигу тамансса давуртту дуллан багьлай бур, рувхIанийсса тарбия дулаву кьиматрай дикIан аьркинссар», — увкунни А. Кахаевлул.
Вице-премьер Рамазан Жяъпаровлулгу цалвамур ихтилат­раву кIицI лавгунни диннал ва миллатирттал дахIаву цIакь дуллалисса давурттив уттиния тиннайгу сантирай дуллантIишиву, экстремизмалун, терроризмалун ххуллу кьукьиншиврул ярагъуннил мазрай гъалгъа къатIий, маслихIатрайн бучIавансса ххуллурду-чаранну ккаклан аьркиншиву. Мяърипат ххуй дуллан оьвтIисса вяъза бувккунни щайх Мусттапа Диб Аль-Бугал. «Зунма оьбала бувнан, оьшиву къадурну, жавабран хъинбала бувара, му чIумал га яла оьхIалма душманнаятугума дус хьун бюхъайссар. Хъинбалдарал ххуллийх нанимари ххуйма», — увкунни ванал. Конгресс­рал ахирданий Дагкомрелигиялул председатель МахIаммад АьбдурахIмановлул республикалул хъуниминнал цIаниятусса Барчаллагьрал чагъарду буллунни конгрессрайн бувкIсса хъамаллуран.