Декабрь зурул 3-нний Аьрасатнал ФСБ-лул ва МВД-лул зузалтрал Талги шяраву бат унни «Ккавкказ Вилаятрал» (МТО «Исламское государство») бакIчи Рустам Асельдеров ва мунал чул бувгьусса 4 инсан. ФСБ-лул бусласимунийн бувну, боевиктал, канийн бучIан мютIи къавхьуну, ихтиярду дуруччай органнал зузалтрайн битлан бивкIун бур.
Битавуртту хьусса кIанттурдай лявкъуну бур автомат, чIярусса пIякь учай затру ва ккулларду. Ва данди бацIавриву органнал зузалтран ва укунмасса инсантуран зарал къабивну бур.
Рустам Асельдеров ур 2014 шинал «Исламское государство» тIисса дунияллул халкьуннал дянивсса террористурал организациярдайн хаин къахьуншиврий хьхьичIва-хьхьичI хъа бувминнавасса ца. Ванайн тапшур бувну бивкIун бур республикалий дуллалисса тахсиркаршивурттай каялувшиву дан ва Ухссавнил Ккавкказуллал региондалий ва Аьрасатнал Дянивмур бутIуй аваза бутансса терактру сакин дан. Ва ур 2013 шинал Волгоградрай, жяматийсса транспортрай ва муххал ххуллул вокзалданий, терактру дурма. Ми иширттаву чIявусса ливтIусса ва бивщусса хьуссия. ЦIана бувсса спецоперациялул хIакъираву силистталул органнал АьФ-лул УК-рал 317-мур (ихтиярду дуруччай органнал зузалтрал оьрмурдайн кьаст лахIаву) ва 222-мур бутIа 2 (цаппара инсантал цачIун хьуну закондалуцIун къабавкьуну ярагъ ишакаш баву) статьярдайн бувну уголовное дело сукку дунни.
А. Аьбдуллаева
