Декабрьданул 6-нний Дагъусттаннал БакIчи Рамазан Аьб­дулла­тIиповлул каялувшиврулу хьунни ДР-лул Антитеррорданул комиссиялул ярглийсса батIаву.

Рамазан АьбдуллатIиповлул увкусса куццуй, ихтиярду дуру­ччаврил органнал чялиш дуккан дунни террорчишиврущалсса талатаву: «Аьрасатнал Федерация ххув хьунни террорчишивруяр, яла-яла Дагъусттан Республикалий. ХIакьину жулва ихтиярду дуруччай органнал виртталну дуллай бур му даву.
Уттигъанну духлаган дунни хъуннасса бандитътурал кьюкьа тайннал бакIчинащал архIал. Му даву дан бювхъуссар агьалиналгу кумаграйну республикалул ва муниципал органнугу хIала-гьуртту хьуну.
«Жулва мурад – агьалинахь экстремистшиврул ва террорчишиврул инсаниятрайн къаршисса идеологиялул хIакъираву бусласавур, мунияту жува циняв ца хьун аьркинссар му идеологиялийн къаршину. Агана жува хIакьину экстремистшиврул, бандитшиврул ва террорчишиврул профилактикалуха зурча, гьунттий жува жулва оьрчIру буруччинтIиссар. Микку профилактикалул бияла хъунмассар», — увкунни Р. АьбдуллатIиповлул.
ДР-лул дуккаврил ва элмулул министр Шагьаьппас Шагьовлул бувсунни оьрчIал ва жагьилтурал дянив экстремистшиврул профилактикалун хасну дуллалисса давурттал хIакъираву.
Жагьилтурал дянив дуллалисса профилактикалул давурттаяту бувсунни ДР-лул жагьилтурал ишир­ттал министр Арсен ХIажиевлул. АТК-лул батIаврий ДР-лул прокурор Рамазан Шагьнавазовлул бувсунни прокуратуралул органнал экстремистшиврийн ва террорчишиврийн къаршину дуллалисса давур­ттал хIакъираву.
Яла гьаз бунни террорчишиврул иширттая арх хьусса инсантал давурттал щаллу баврил ма­съаларттугу.