ЦIуссалакрал райондалул КЦСОН-далул зузалтрал мудангу хъуннасса аякьа дувай цала биялдаравусса кулпатирттах. Уттигъанну ва центрданул хъунмур Минажат Аьлиева хьунабавкьунни ЦIуссалакрал шяраву хIурматрайсса, чIявусса оьрчIру хъунигу бувну, ччаннай бацIан бувсса Умалаева Рабиятлущал.
Рабиятлул ччаннай бацIан бувну бур 7 оьрчI. Ми циняв, ларайсса кIулшивурттугу дуллуну, цала-цала ххуллийн бивчуну бур. Рабият бур хъунмасса захIмат бивхьусса хъамитайпа, хIакьинусса кьинигу ва школалий оьрчIахь байбихьулул классирттахь дарс дихьлай бур. Ва хъинну ххирасса бур дуклаки оьрчIан ва миннал нитти-буттан, хIурматрай бур учительтурал коллективраву.
ЦIуссалакрал райондалий дяъвилул ишру нанисса чIумал Рабиятлул къатри снаряд дагьну, ччурччуну дуссия. Та чIумал ванин, оьрчIащал архIал, къуртал дан дурасса къатравун Новостройрайн бизан багьуна. Рабиятлул лас Умалаев Нуцал 1991 шиная 2004 шинайн ияннин шоферну зий ивкIун ур МСО-рай. Мунияр махъ, хIакьинусса кьинигу ва зий ур цIуминалийсса ЦIуссалакрал школалий. ЦIуминалийн бивзун махъгу ва кулпатран диялсса захIматшивуртту духIан багьну бур. Щин, чани, газ бакъасса шартIирдай ялапар хъанай бивкIун бур. Транспорт дакъа, кIира километралийх школалийнгу, школалия шаппайгу занай бивкIун бур. Укун захIмат бивхьусса кулпатру ЦIуссалакрал райондалий чансса бакъар. КСЦОН-далул зузалтрал байраннайгу, байранну дакъасса, укуннасса кьинирдайгу укунсса кулпатирттал ялун бивну, цащара шайсса къулагъас дай. Ва кьинигу КСЦОН-далул отделениялул хъунмур бакIчисса центрданул зузалтрал дакIний личIансса бахшиш дунни Умалаевахъал кулпатран.
Умалаевахъал кулпатралгу дакIнийхтунусса барчаллагь увкунни Минажат НурмахIаммадовнахь ва мунил зузалт Гаппаевахь, Сайпуллаевахь, ХIусайновахь.
