Исякьлул душ Абакарова Жарият
Махъсса чIумал къашавай шанийгу бивкIун, оьрмулул 81 шинаву аьпалухьхьун лавгунни яхI-къирият ххисса зунттал хъамитайпа, Карашрал шяраватусса Исякьлул душ Абакарова Жарият.
Жарият бувну бур 1935-кусса шинал Карашрал къутандалий. ЧIавания шинмай жард къаувкуну зий бивкIун бур К. Маркслул цIанийсса колхозрал давурттай. 1968-кусса шинал ласнащал архIал бивзун бур Щамххал-Терменнайн. Му чIумуя шинмай зий, захIмат буллай бивкIун бур гиккусса совхозрай, лухIитIутIул багъирдаха къуллугъ буллай. Ванил сурат, ца яла хьхьичIунсса зузала хIисаврай, тачIаврагу чан хьуну дакъар ХIурматрал улттуя, ларсун дур цимирагу грамота, бахшишру.
Жариятлул бивкIулул жижара буллай буру ласнахь Абакардухь, арсурваврахь Баринахь, Батирдухь, душурваврахь ПатIиматлухь, Фирузахь ва махъсса цинявппагу уссур-ссуннахь, гъан-маччаминнахь.
Цил рухI бигьаний дишиннав!
Карашрал жямат
Щамххалал душ Кьуцмаева ПатIимат
Декабрь зурул 15-нний оьрмулул 110 шинаву дунияллия лавгунни 1-мур ЦIувкIуллал шяравасса Щамххалал душ Кьуцмаева ПатIимат, дяъвилул ва захIматрал ветеран.
1906 шинал май зуруй бувсса ПатIимат ЦIувкIуллал агьалинаву (бюхъай Ккуллал райондалул агьалинавугума бикIан) яла оьрмулул бугьарамур хъамитайпалун ккаллийну буссия.
Аьрая лас зана къавхьусса ПатIиматлул душ ва арс цилалу ччаннай бацIан бувссия, колхозрал даврий зий оьрму гьан бувссия цилагу. ЗахIматрал фронтрайгу бивкIссар, зий бивкIссар райпорайгу, Гъумучату райондалийн ччатI ххилайгу, Мамедкъалалив тIутIул багъирдавугу. Ци даврий зурчагу, ПатIимат бия захIмат ххирасса, дуллалисса даву мудангу усттарну дувайсса инсан. ХIукуматрал мунил захIматран лайкьсса кьимат бивщуну бур, чIярусса ХIурматрал грамотартту ва бахшишру дуллуну дур. ДакI, аьмал хъинсса, халкьуннащал хIал бавкьусса ПатIимат ЦIувкIуллал жяматран ххирассия, душнил оьрчIал вив лавсун, аякьалий ябуллай буссия. Ваксса хьуну акъа инсан дунияллия къагьаннав тIий, жижара буллай буру ПатIиматлул душнихь Жавагьихь, куявнахь ХIусайннухь, вайннал наслулухь, гъан-маччацириннахь. Алжаннул ххари буваннав ПатIимат, гьаттай нур дизаннав!
1-мур ЦIувкIуллал жямат
ЗахIматсса цIуцIаврища ххассал къавхьуну, вай гьантрай жуятува батIул хьунни ххаллилсса инсан ва каялувчи, Кьубиял школалул директор,
МахIаммадов Залимхан МахIаммадлул арс.
ДакIнийхтуну хъуннасса кьурчIишиву кIидачIлай, жижара буллай буру ванал кулпатрахь, арсурваврахь, гъан-маччацириннахь. Махъминнал оьрмурдай барачат бишиннав! Залимханнул рухI хъинний дишиннав! Алжаннул ххари аннав!
Лакрал райондалул администрация
Аьвдуллагьлул душ АхIмадова Шюъбанат
Уттигъанну, цIуцIи шаний мадара хIалгу бувну, оьрмулул 80 шинаву ахиратравун лавгунни дакIнийхтуну бивхьусса захIматрайну чIявучин бусрав хьусса уздансса хъамитайпа, яхI-къириятрал заллу, Вихьлиятусса Аьвдуллагьлул душ АхIмадова Шюъбанат.
Ччяни буттацIа хьусса Шюъбанат, 7 классгу къуртал бувну, колхозраву зун байбивхьуссар. Циярва мюрщисса кIия уссу ва кIива ссугу мунил канивун ялугьлай ливчIун бия. Тай шиннардий, нину-ппу ливтIукун, оьрчIан пенсиягу къабишайва, яла ххюя ятиннал оьрму цукунсса бивкIссарив гьарцаннан чIалачIисса зат бур. Бабаюртлив, Бажиганнайн лагайва яла захIматсса давурттайн. Хъунмур оьрму аьпа бивул Бабаюртлив дояркану зий лавгуна, яла махъ Щамххаллай пекарнялий зий бикIайссия. Чув зий бухьурчагу, Шюъбанатлул даву чIанулун дуртун, цила багьайсса куццуй дайва. Лайкь хьуссар чIярусса грамотарттан, арцуйнусса бахшиширттан. Сайки 2 шин хьуна Шюъбанатлул шанийн багьну, амма цалагу аьсив къавхьуссар, цIими чIа тIисса махъ къабуккайва зумату. Ванил душваралгу, уссурссунналгу ххуйсса хIурмат бувссар Шюъбанатлуха, ЗанначIа хъинну лякъиннав.
Шюъбанат ахиратрал хьуну хъуннасса кьурчIишиву кIидачIлай, жижара буллай буру арсурваврахь, душваврахь, уссурссуннахь, махъсса цинявннахьвагу. Цил гьав нурданул дуцIиннав, алжаннул ххари баннав. Махънал оьрмурдай барачат бишиннав. Амин.
Вихьуллал жямат
Бавал аьпалун
Вай дакIнива нанисса махъру, ца жул баван Шюъбанатлун бакъа, хасъссар цинявппагу колхозрал давурттай аьйплу хьуннин, жан дукканнин зий бивкIцириннан.
Вила бувсса захIматран
Дагьаймургу къакIулну,
Даву къизгъинну дунийн
Дачайвав, ххира бавай.
Хъуру дачIайни «ккаччал»,
Винъя — ттукрал дукаймур.
Яржа къабиллай ницал,
Хъу чIатIух дугьайссия.
КIури, кIирири къатIий,
БухIлай «бурцIурдил» зулму,
Ахиргу цIуцIи шаний
Лавгуна ливчIмур оьрму.
ЦIий дуна, къюруй дуна,
ЦIуру-кIуру къабуллай,
ХIакьсса зузала – ина
«ЦIан къатлувун» ларгунна.
Барчаллагь вин, барчаллагь,
Жунгу зун лахьхьин бувсса,
Дунъяллул заллу – Аллагь
ДакIнивун кьутIин увсса.
Аьшура, МалихIат, Соня,
ш. Вихьул
