ЖКХ-лул тарифирттал хIакъираву бусан журналистътуращал хьунаакьин увкIунни ноябрьданул 1-нний «Дагестан» РИА-лул конференциярду дувай залданувун тарифиртталсса байсса республикалул къуллугърал (РСТ) хъунама Умархан Амирханов. Ва хьунабакьаву хьунни «Открытая власть» проектрал лагрулий.

П. Рамазанова
Ванал бувсунни цува каялувшиву дуллалисса идаралул коммунал хIаллихшиннардал тарифирттал ялувбацIаву дувайшиву. «Жул службалул кIирисса ва дяркъусса щинал тарифру ккаккан дувайссар, мукунма щинал турбардая щин дуцин ччиминнансса тарифругу ккаккан дувайссар, ччуччиялул тарифру, керосинналийн бияннин, ттукIлилсса ва гъилишиврулсса буллалисса комплекс – цимурца жул ведомствалул биялдарайри. Федерал законодательствалийн чул бивщуну, цимурца хIисавравун ларсун, жу багьа бивщуну тарифру ккаккан дувайссар. ДачIи шинай цал. Багьри баххана бувайссар гьар шинал июль зурул 1-нния тIайла хьуну. Хъиривмур шиналнинсса дахханашиннардал хIакъи-хIисавгу дуван аьркинссар ва нанисса шинал декабрь барз къуртал хьуннин, яъни ялунчIинсса шинал тарифирттал бази бувну бикIан аьркинссар нанисса шин къуртал хьуннин», — увкунни хъамаличунал. Журналистътурал суаллахьхьун жаваб дуллай, ванал бувсунни ларгсса шинал коммунал хIаллихшиннардайнсса багьри гьаз хьушиву Дагъусттаннай 4 % кьаралданий, 2017 шиналгу 4 процентраяр ххишала гьаз къахьунтIишиву. Бувсунни журналистътурал хьхьичIвасса зурдардих махъ ккаккан бувсса багьри ласлай бушиврия рязи бакъасса бушиву агьалинаву. Умахан Амирхановлул бувчIин бунни, агана багьа къатIайлану лавсшиврийн щак тIий бухьурча, квитанциярдугу дирхьуну аьрза чичин аьркиншиву ва адресрай : 367000, МахIачкъала, Къорхъмасовлул цIанийсса кIичIиралу, 24. Ягу баян буван аьркиншиву Горячая линиялийн : 67-23- 92.
РСТ- лул хъунаманал бувсунни чара бакъа мукунсса иширттал хъирив лаяйшиву, тарифирттая рязи бакъа чIявусса инсантал суд- диваннайнгу буккайшиву.