Уттигъанну жула республикалул М. Къажлаевлул цIанийсса школалул педагогтал ва микку дуклакисса оьрчIру гастроллай лавгунни чIаххувсса Чачаннал Республикалийн. Грозный шагьрулийнсса аьрххи хьунни «И живем мы сердце к сердцу – дети дома одного» цIанилусса творчествалул проектрал лагрулий.

Жула республикалул гьунар бу­сса оьрчIру хьунабавкьуссар Чачаннал Республикалул Муслим Магомаевлул цIанийсса Миллатрал музыкалул школалул оьрчIащал ва педагогтуращал.
Концертравух гьуртту хъана­хъиминнал хьхьичI махъ лахълай, Чачаннал Республикалул Культуралул министерствалучIасса Сакиншиндарал даврил ва кадровый политикалул департаментрал директор Ибрагьим Исакьовлул увкуну бур:
— Чачаннал Республикалул Культуралул министерствалул хъунмасса барчаллагь тIий бур Мурад МахIаммадович Къажлаевлухь музыкалул кIулшиву дулавриву­сса Чачаннал Республикалул ва Да­гъусттаннал Республикалул дянив­сса культуралул арарду хьхьичIуннай давриву бихьлахьисса бутIухлу. Вил творчество дур яргсса, симфониялия балайлийн бияннин, музыкалул циняв жанрарду цивунна ларсъсса. Цивугу дур, ца дагъусттаннал культура дакъасса, личIи-личIисса халкьуннал культурарду. Вила творчествалуву вища бювхъунни «национальное ва интернациональное» цачIун дуван. Багьа бищун къашайссар дагъусттаннал миллат­рал балетраву, кинофильмардан­сса музыка ва балайрду чичавриву, билаятрал музыкалул искусст­во хьхьичIуннай давриву ина бивхьусса захIматран. ЛяличIийссава хIурматран лайкьри гьунар бусса чIава жагьилтал ялун личин бавриву, миннаву музыкалухсса ччаврил гьану бизавриву ина буллали­сса хIарачат. Хъунмасса барчаллагь вин вила чIявумиллатирттал творчествалухлу», — увкунни ванал.
Мурад Къажлаевлул школалул ва Муслим Магомаевлул цIанийсса школалул ччянирасса творчествалул дахIаву дур. Вай кIивагу школа цачIу цимилгу гьуртту хьуну бур личIи-личIисса фестиваллай, концертирттай, шадлугъирттай. КIивагу школалул дуклаки оьрчIру 2014 шинал бувххун бур В. Гергиевлул каялувшиндаралусса Аьрасатнал ОьрчIал цачIусса хорданувун, мура шинал гьуртту хьуну бур Мариинский театрдануву хьусса концертравух, Сочилий Олимпий тIуркIурду лакьлакьисса Церемониялувух, Къиримнаву Аьрасатнал Кьинилун хас дурсса концертравух ва 2015 шинал Кремлилуву хьусса «Славься, наш могучий край» концертравух.