Ларгсса нюжмардий Дагъусттаннал паччахIлугърал университетрал филологиялул факультетрал 1-мур курсирал студентътал хьунабавкьунни художник, публицист, ккавкказуллал литературалул ва художествалул «Горцы» кказитрал хъунама редактор, «Молодежь Дагестана» кказитрал культуралул отделданул редактор Марат ХIажиевлущал.
Ва хьунабакьаврил сиптачи хьунни факультетрал Жагьилтурал иширтталсса бувайсса комитет.
Цимивагу гьунар бусса жула лакку оьрчIал бусласимуних цалчинмур курсирал студентътурал хъунмасса гъирарай вичIи дирхьунни. Тарив политехнический институт язи бувгьуну, му къуртал бувсса Маратлун цанмавагу му чIумал пикри къабивкIун бур махъ цува творчествалулмур аралуву зунссара тIисса.
— Ттул пикри буссия конструктор хьунсса, схемарду дихьланна радиоэлектронный аппаратуралунсса тIисса, амма заводрайн агьну махъ бувчIунни нава ттула дакIнил къаларсъсса давриха зий ушиву…
Мукун, 1996 шинал Марат агьну ур «Молодежь Дагестана» кказитрал редакциялувун. Муния тинмай байбивхьуну бур ванал гьарта-гьарзасса творчествалул ххуллу.
Филологиялул элмулуву цалчинсса шаттирду ласласисса жагьилтурал Маратлухьхьун булунсса суаллугу къачанъя.
