Жу хьхьичIмур номерданийгу кутIану бувсъссия чани бакъаминнансса кинордал цалчинсса фестиваль хьушиву Дагъусттаннай, миннай дакI цIуцIаву дурну. Му цурдагу Аьрасатнаву Кинорал шинан хас дурну дунни.
П. Рамазанова
Чани бакъаминнансса кино – му тифлокомментариярду дусса фильмрур. Тифлокомментарий – киноравусса костюмирттая, декорациярдая, спецэффектирдая, актертурал къуццу тIутIаврия бусласисса хасъсса аудиоинформацияр. Аьрасатнаву тифлокомментариярду дусса кино хьхьичIра-хьхьичI ккаккан дурну дур 1978 шинал Москавуллал «Буревестник» тIисса кинотеатрдануву. Перестройкалул шиннардий мукунсса кино ккаккан дуваву дарцIуну дур, 2004 шинал цIунилгу му даврих къулагъас дуллан бивкIун бур. ХIакьинусса кьини оьрус мазрайсса 100 кино дусса дур тифлокомментариярду дусса. Миннувасса цаппарар Дагъусттаннайсса фестивальданий ккаккан дурссагу. Цалчинсса кино ккаккан дурна МахIачкъалалив, Расул ХIамзатовлул цIанийсса Миллатрал библиотекалул конференц-залдануву. Му «Гагарин. Космосраву цалчинма» тIисса кино дия. «Укунсса кинорду ххал дувансса хIалу дирияву чани бакъаминнан хъуннасса ххаришивур, щаллуну кинорал мяъна-мурадгу бувчIлай бухьувкун инсантал, кинорая багьайкунсса неъмат ласлай бур, кинорал искусствалия махIрумну личIлай бакъар», — тIий ур ВОС-рал Дагъусттаннаймур организациялул председатель ХавлатIип НазирхIажиев. Ванал бувсмунийн бувну, Дагъусттаннай усса ур чани чансса ягу бувагу бакъасса 18 азара инсан. Фильмру дусса дискру кIанттул ВОС-рал филиаллайн тапшур дуван тIий бур. Кинорду ккаккан дурну дур МахIачкъалаллал школа-интернатраву ва Буйнакскалий кIанттул идаралий. «ХIакьину, цIуллу-сагъсса инсантал анжагъ цалва балаллий бусса ппурттуву, чани бакъасса инсантурал буруккинттаягу хавар бусса идара бушиву – му чаннал тIимур, кино ххал дуван бюхълахъисса инсаннан цува учIисса инсан ушиву, цайвагу аьтIисса бушиву асар хъанахъиссар», — тIий бур душнищал кино ххал дурсса Зубайрижат Халидова. Чани бакъаминнан «чаннал тIимуну» хьусса ххаришиву пишкаш дурмургу ПАО Сбербанкрал Дагъусттаннаймур отделенияр. Буниялттунгу, баяннав жунма чани бакъаминнал бикIу, чIу къабаяйминнал бикIу, чурххал базурду бакъаминнал бикIу дакIурдил чIу. ЦIуллу-сагъшиврул нукьсансса инсантал цахунма цивппа бивчусса билаят тачIавгу ххуйсса билаятну бикIан къабюхъайссар.
