Ноябрьданул 4-нний Халкьуннал цашиврул кьинилуцIун дархIусса шадлугъру шай щалагу Аьрасатнаву. Ва байран кIицI лаглай бур 2005 шиная шиннай. Байран дуллан бивкIссар, 1612-ку шинал Мининнул ва Пожарскийл каялувшиндаралу Москав Польшанал интервентътурацIа марцI бувсса иширттал хъамакъабитулун цIа куну.
Бадрижамал Аьлиева
Ва байрандалун хасну Аьрасатнал цайми регионнавух Дагъусттаннайгу шай личIи-личIисса шадлугъру.
Му кьини МахIачкъалалив Оьруснал театрданул хьхьичI хьунтIиссар цаппарасса мероприятияртту.
Ссят 11.00 дикIантIиссар шадлугъ МахIачкъала шагьрулул Культуралул управлениялул ва ОьрчIал филармониялул сакин дурсса шадлугъ. Муний дакIнийн бутантIиссар жулва билаятрал тарих, Аьрасатнал вирттал, буслантIиссар паччахIлугърал символикалия. Хъирив ккаккан дантIиссар концерт. Мунивух гьуртту хьунтIиссар МахIачкъала шагьрулул ОьрчIал филармониялул солистътал, оьрчIал магьирлугърал школардал тарбиялувтал, мукунма цаймигу коллективру.
Ссят 13.00 дикIантIиссар концерт, МахIачкъала шагьрулул администрациялул ва Культуралул управлениялул хIадур дурсса, мунивух гьуртту хьунтIиссар республикалул творчествалул коллективру.
Ссят 14.00 дикIантIиссар ДР-лул Миллатирттал политикалул министерствалул сакин дурсса митинг, муний гьарцаннаща бюхъантIиссар ва байрандалухсса цала ургаврия бусан. Хъирив хьунтIиссар «Вместе мы – Россия» цIанилусса концерт. Мунивух гьуртту хьунтIиссар республикалул паччахIлугърал ва творчествалул коллективру, музыкантътал ва артистал. Концертрал сакиншинначиталну бур ДР-лул Культуралул министерство, ДР-лул Миллатрал политикалул министерство, ДР-лул Культуралул министерствалучIасса Республикалул Халкьуннал творчествалул къатта, МахIачкъала шагьрулул администрация ва Культуралул управление.
Ноябрьданул 4-нний А. Тахо-Годил цIанийсса Дагъусттаннал цачIун бувсса тарихрал ва архитектуралул музейраву хьунтIиссар «Ночь искусств». Т. Мурадовлул цIанийсса Дагъусттаннал паччахIлугърал филармония гьурттуну ккаккан дувантIиссар цIусса программа «О чем молчат атланты».
«Дом Дружбы» ГБУ-луву Халкьуннал цашиврул кьини дуллай бур «ТIиртIусса нузардил кьини».
Дагъусттан Республикалул Аьрасатнал халкьуннал Дусшиврул музейрал экспозиция ноябрьданул 5-нний гьуртту хьунтIиссар Ростов-на-Дону шагьрулий «Донское землячествалун» 20 шин хъанахъисса шадлугъравухгу.
Ноябрьданул 4-нний Шеърилугърал театргу гьуртту хъанай бур щалагу Аьрасатнал «Ночь искусств» акциялувух. Ссят 18.00-нния 21.00 хьуннин ччинаща бюхъантIиссар ххал дуван Ибрагьим ва Мурад Халиловхъал выставка «Обрывки киноленты», миккува тамашачитал хьунабакьинтIиссар автортуравасса цаннащал.
ЦIа дурксса шаэртуралгу цалагу чивчусса шеърирду буккинтIиссар «Лира» литературалул клубрал жагьилсса шаэртурал.
«Canvas» цIанилусса творчествалул студиялул Шеърилугърал театрданул жанахIраву дувантIиссар оьрчIал карунних ва дагъусттаннал художниктурал дурсса давурттал выставка-продажа. Шикку хьусса арцу дулунтIиссар ДРКБ-лул онкогематологиялул отделениялийн оьрчIансса даруртту ласун.
