Ново-Огаревалий АьФ-лул Президентнал резиденциялий Владимир Путин хьунаавкьунни Дагъусттаннал БакIчи Рамазан АьбдуллатIиповлущал.
Хьунабакьаврий ДР-лул БакIчинал бувсунни ларгсса шанна шинал мутталий зий бивкIшиву проектрал управлениялул гьанулийну, муния региондалий хъинчулийсса дахханашивурттугу хьуну душиву.
«Шанна шинал мутталий республикалий щурущи дурну дур проектрал управление, циняв министерстварттаву ва ведомстварттаву муниципал сакиншиннардай дузал бувну бур проектрал офисру, миннуйну жуща бювхъунни цIу дуккан дуван низам ва экономикалуву щаллу дуван хъинчулийсса давуртту ва ккаккияртту», — увкунни Рамазан АьбдуллатIиповлул.
Дагъусттаннал БакIчинал мукъурттийн бувну, хьхьичIунмайшиврул бущи хIисавравун лавсун Дагъусттан бур Аьрасатнал регионнаву яла хьхьичIунми 5 региондалуву. Хъуннасса къулагъас дуллай бивкIссар «Экономика чаннайн дуккан даву ва мюнпат бакъасса харжлугъирттал оптимизация» тIисса проектрах. 2015 шинал республикалий бюджетрал харжлугъирттал оптимизация дурну диркIссар 3,1 млрд. къурушру, 2016 шинал оптимизациялул план дур сайки 4 млрд. къуруширттал
Республикалул хъунаманал Владимир Путиннухь бувсунни мукунма цаппара перспективсса проектирдаятугу. АьбдуллатIиповлул пикрилий, миннуя хъунмасса мюнпат хьунссар региондалул маэшатраву хъинчулийсса дахханашивуртту хьун давриву.
Республикалий цалий дацIаву шаврил ца ккаккияну хъанай дур республикалул парламентравунсса ва ПаччахIлугърал Думалувунсса бувчIавуртту ххуйну даву, чIявуми чIурду «Единая Россия» партиялухлу буллунни. «20 шинал мутталий 57 процентрал цIу буккан бувссар республикалул парламент», — увкунни Рамазан АьбдуллатIиповлул.
ХIадур бувссар
ХI. Аьдиловлул
