ДР-лул Роспотребнадзорданул управлениялул уттинингу кIицI байва МахIачкъалаллал шагьрулул марцI-чапалшиврул тагьар ххуйну да­къашиву, амма му учреждениялухь ихтияргу дакъая му иширан хасъсса чаранну лякъин. Мунияту мунин багьлай бия так шагьрулул къатрачIасса кIанттурду ва кучарду ци тагьарданий бурив ххал буллан.

ХIасан Аьдилов
Утти Роспотребнадзорданул зузалтрал цалла зузи кьини дайдишайссар МахIачкъалаллал кучардаву цIинцI-ччюрк салкьи дай­сса кIанттурду ххал буллай. Ти­кку цIинцIал бакIурду ххал хьурча, кIайннул суратругу ларсун, адресгу чирчуну, шагьрулул бакIчиначIан тIайла дуккайссар, тай кIанттурду чапалшивруцIа марцI бара тIий. Амма шагьрулий марцIшиву дуру­ччаврихлу жаваблувсса компаниялул цара-ца куццуйсса жаваб дучIайва: «Информация хIакьсса бакъар. Зул фотоматериаллу хьхьичIрасса дур»,- тIий. Мунийн бувну Роспотребнадзорданул ярглийсса рейд хьуну дур «МарцIсса шагьру» тIисса компаниялул зузалтгу хIала-гьурттуну. Ва ххуллух шагьрулийх буклай бунува чIалан бивкIунни цаппара кIанттурдай тагьар тамансса даххана хьуну душиву. Амма цайми кIанттурдайн бивсса чIумал, ххал хьунни щаллу­сса антисанитария: цIинцI-ччюрклил бакIурду, бувцIуну ялтту экьи нани­сса цIинцI-ччюрк дичайсса къуршив, инсантал заназисса кIанттурдайгума ччюрклил бакIурду, аьллалисса дукиялул кьанкьру. ЦIинцI дукьай компаниялул вакилтурал гацIанава оьвкуну цалва зузалтрайнгу, дукьан дан бунни ти­чча цIинцI. ХIакьинусса кьини дурсса ва дуллалисса давурттайну хъин чулийсса дахханашивуртту хьунни марцIшиврул чулуха Акушинскийл, Перова, Научная кучардаву. Роспотребнадзорданул тавакъю буллай бур шагьрулул инсантурахь, агарда цIинцIал бакIурду хIасул хъанай бухьурча зува ялапар хъана­хъисса кIанттурдачIан гъанну, оьвчин «горячая линиялул» телефондалувух +7(8722)69-03-05.