ДР-лул КIулшивуртту дулаврил ва элмулул министерствалул республикалул кIулшивуртту дулаврил идарарттал дянив гьашину цалчин бунни «Лучший кабинет родного языка» тIисса конкурс.

И. Саидова
Конкурс баврил сиптачину хьунни яруссаннал миллатрал мазрал дарсирдал учительтурал ассоциация. Вайннал мурад бия миллатирттал мазурдийсса дарсирдал кабинетру цимурцаннул дузал баву, хьхьичIунну дарсру дихьлахьисса учительтал аьлтту баву ва миннал даврил опыт цайминнангу машгьур баву.
Дагъусттаннал миллатирттал мазурдий дарсру дихьлахьисса 40-нийн бивсса учительтурал гьур­ттушинна дурсса конкурсрал даврил хIасиллу дуллай бия Аь. Тахо-Годил цIанийсса Дагъусттаннал педагогикалул элму ахттар дай институтраву.
— Цимурцаннул дузал бувну, бакьин бувсса кабинетру бусса школарттай ниттил мазру лахьхьин буллансса чаранну ххишала хъана­хъиссар. Мунияту учительнал кабинет щаллу бувну бикIан аьркин­ссар чIалачIи пособиярттал, материаллал, техникалул кьайлул. Мукунсса кабинетру бусса школардай оьрчIан ниттил маз лахьлан­сса гъира-шавкьгу ххишала буссар, — увкунни ДР-лул КIулшивуртту дулаврил управлениялул консультант Раисат МахIаммадрасуловал.
Конкурс сакин бувну бия шанма бутIуя. Цалчинмур бутIа бия «Визитная карточка кабинета» ва миллатрал мазрайсса калимарттайну инсан хьунаакьаву, кIилчинмур – «Моя школа, мой кабинет, моя профессиональная деятельность». Конкурсрал шамилчинмур бутIуву учительтурал ккаккан бунни миллатирттал мазурдийсса дарсирдал мастер-классру.
Учительтурал даврин кьимат бишлашисса жюрилуву бия Рес­публикалул КIулшивуртту дулаврил министерствалул вакилтал, Аь.Тахо-Годил цIанийсса Педагогикалул элму ахттар дай институтрал пишакартал ва миллатирттал мазурдийсса дарсру дишавриву хьхьичIун ливчусса учительтал.
— Кабинетраву учительнан хIасул дан аьркинссар цала ичIура куннасса тIааьнсса тагьар. Мунияту учительнал бурж так ца дарсру дишавриву ба­къассарча, дуклаки оьрчIру шавкь дуну дарсирдайн занази буллансса чаранну лякъавривугу бу­ссар. Мукун­сса учительтал бусса школардайн ниттил мазру лахьхьин заназисса оьрчIругу гьарзасса бур, — увкунни конкурсраву гьурттушинна дурсса учительнал.
Конкурсрал давриву ххув хьуминнан ва гьурттушинна дурминнан буллунни Респуб­ликалул КIулшивуртту дулаврил минис­терствалул чулухасса дипломру.