Виваллил иширттал зузалал байрандалул гьантрай жун дакIнийн утан ччай ур личIи-личIисса шиннардий Лакрал ва ЦIуссалакрал районнал милицанал даврий зий ивкIсса дяъвилул ва захIматрал ветеран Магьдиев МахIаммад Магьдинал арс. Ялун нанисса шинал 100 шин бартлаглай дур МахIаммад Магьдиевич дунияллийн увккун.

Увну ур МахIаммад 1907 шинал Ххюлуссуннал шяраву хъудугьул кулпатраву. Буттал шяраву биял бакъа школагу къуртал бувну, 15 шинал оьрмулуву лавгун ур Армавирдайн къалайчину зун.
1928 шинал тиха зана хьуну, зий айивхьуну ур Ххюлуссуннал шяраваллил советрал секретарьну. Гихунай, Къизлардайсса шяраваллил хозяйствалул техникумгу къуртал бувну, зий ивкIун ур цал Ххюлуссуннал шяраваллил советрал, яла колхозрал председательну.
1935 шиная тихунай сайки 20 шинал манзилданий зий ивкIссар Лакрал ва ЦIуссалакрал районнал низам дуруччай органнаву личIи-личIисса давурттай. Цаппарасса шиннардий зий ивкIссар Дагъус­ттаннал НКВД-лул Лакрал райондалул отделданул каялувчину. Дяъвилул шиннардий ивкIссар истребительный кьюкьлуву ватандалийн къаршиминнащал талай. Вай талатавурттаву дурсса чувшивурттахлу лайкь хьуну ур ПаччахIлугърал наградарттан – личIи-личIисса орденнан ва медаллан. Дяъвилул махъсса шиннардий талай ивкIссар республикалийсса бандформированиярттащал.
Отделданул каялувчину зузи­сса чIумал МахIаммад Магьдиевичлул цала зузалтрахь чIявуну кIицI байва Ф. Э. Дзержинскийл махъру: «Милицанал зузалал бикIан аьркинссар саргъунсса бакIгу, кIирисса къюкIгу, марцIсса каругу» тIисса.
Милицанал даврия лавгун махъгу МахIаммад Магьдиевич зий ­уссия Лакрал райондалул Шяраваллил хозяйствалул управлениялул агрономну, КПСС-рал райкомрал инструкторну, нагь-нис дайсса заводрал директорну, ххуллурдал отделданул каялувчину.
Пенсиялийн увккун махъгу МахIаммад Магьдиевичлул хъуннасса дахIаву дия жяматращалгу, милицанал зузалтращалгу, райондалул каялувчитуращалгу.
Цала кулпатращал МахIаммад Магьдиевичлул тарбия бунни мукьва оьрчI. Ванал арс Магьдиев Арсен, Дагъусттаннал ПаччахIлугърал университетрал физико-математический факультетгу хьхьичIунну къуртал бувну, хьунни профессор. Зий ур ДГПУ-рал физико-математический факультетрал деканну. Цала коллективраву ва бусравну, хIурматрай ур.
Шиккува кIицI бан, 1969-1985-ку шиннардий, сайки 16 шинал му­тталий, Лакрал райондалул виваллил иширттал отделданул каялувчину зий уссия МахIаммад Магьдиевичлул ссил арс Бадруттин Абачараев. Вагу, цала ниттиуссу куна, жяматрангу, райондалул каялувчитуран ва Республикалул Виваллил ишир­ттал министерствалул каялувчитурангу хъинну бусравну, цала къуллугърал буржру лайкьну биттур буллай уссия.
МахIаммад Магьдиевич мудангу личIантIиссар милицанал зузалтрал ва жяматрал дакIурдиву.
Исмяил МахIаммадов,
отставкалийсса милицанал майор, Лакрал райондалул низам дуруччай органнал ветерантурал советрал
хъунама