Махъсса шиннардий цIулаглай дур инсантурал рувхIанийсса культура, шиная шинайн чIяву хъанай бур жула шяраваллаву ва шагьрурдай мизитру. ХIатта инсантурал адав-мяърипат, культура тIайланна мизитирттал аьдадрая хъар хъанай дакъахьурчагу, хIакьинусса кьини мизит бакъасса шяравалу, шагьру аьжаивну чIалай бикIай, цирив ца агьамсса зат диял къахъанахъисса кунна. Мукунна чIалай дикIайва Шахьуйннал щаргу. Аллагьнайн щукрур, уттигъанну байбивхьунни шиккугу мизит буллай.

Бадрижамал Аьлиева
Цукссагу хIалъя шяраваллил инсантурал дянив мизит бакъа чара бакъашивриясса, му буван аьркиншивриясса ихтилатру най. Ахиргу, ва сипта цалла кIунттихьхьун ларсун, ва бусравсса даву дайдирхьунни бу­ттал ва арснал – Шахьуйннал шяравасса МахIаммад ва Арслан Сагидовхъал. Вайннал дур­сса дайдихьулул чIарав бавцIунни Шахьуйннал ва лакрал цаймигу шяраваллил инсантал, хIатта цайми миллатирттал вакилталгума.
Бия ва чIирисса шяраву мивун цу занантIиссар, чак буван ччиманаща цала шаппагу буван хьунссар тIиссагу. Амма мизит бакъасса шяраву барачатшивугу дакъассар.
Гъинттул шяравун жагьи-жугьулт бавтIсса чIумал, нюжмаркьинисса чаклийн ми Гъумукун ягу цайми шяраваллавун лагайва. Цуксса къаххуйри, нюжмаркьини бикIу, вайми кьинирдай бикIу, жагьилтал шяравувасса мизитравун батIлай. Гьай-гьай, шатта ккавк чув хIинчурая нигьаусайсса куна, чув, ци шяравусса бухьурчагу, инсантураву вас-ццах бур жагьилтал аьркин бакъасса, бавккусса чулийнмайгу бачлан бикIайхха тIисса, махъсса цимирагу шинай хъанахъисса ишругу чIалай. Амма, гиччава най буна мизитирттавунгу занай, хIакьсса диндалул кIулшивурттугу мюрщинийра дуллай бивкIссания, цIанасса заманнай хъанахъисса авара­сса иширттавух чIявуми бюхъайва хIала къахьунгу. ХIанттихун, наркотикирттахун ва цаймигу аьркин дакъасса давурттахун багьмигу мукунма къабукканссия му ххуллийн. Ци-бунугу, мизит чара бакъа аьркинни шяраву.
БакIрайва МахIаммадлун мизит дяшяраву буван ччай бия, шяравун буххайхтува итталун багьансса кIанай. Ахиргу мизит буллан байбивхьунни шяраваллил цIусса махIлалий, хIатталлил тия чулий.
Хасъсса техникалул гьану бувккун махъ, му цила капливун бутан, куртI ва гьарта буван увкIун ур 12-ксса инсан, шяравассагу, цайми шяраваллавассагу. ХIатта ЦIахъардал чIарахсса шяраваллавагу кумаг­ран бувкIун бур диндалул уссур­вал. МахIаммад хъунмасса барчаллагьрай ур цалчинна-цалчинсса давурттавух гьур­тту хьун, чIарав бацIан бувкIсса гьалмахтурайн, хаснува Лакрал райондалул имам, Кьубиял шяравасса, ХIажимурадов Шагьмурадлуйн, ЧIурттащиял имам Дибиров Идрислуйн, Хъурхърал имам Макьсудов Аьбидлуйн, Шахьуйннал шяравасса Аьлиев Зураблуйн, Аьлиев Аьбдуллуйн, Аьлиев Адильгарайн, ХIасанов Русланнуйн, МахIаммадов Зиябуттиннуйн ва м.ц..
Сбербанкрай тIиртIуну дур счет, мизит буллалисса давур­ттан ччинаща цала дакI дир­ссаксса, цащава шайссаксса кумаг буван бюхъаншиврул. Чан-чанну тIий байбивхьунни ва счетрайн арцу дичлай, Шахьуйннал шярава бакъасса инсанталгума.
— Мизит буллалисса давур­ттансса арцу счетрайн дирчуну гьарцагу чулуха бигьашиву дур, яла-яла харж дурсса арцу чун ци ларгссарив распечатка дуван бюхъаншиврул. Жу дурсса даврил, харж дурсса гьарцагу къурушрал жаваб дулунтIиссар Аллагьналгу, жяматралгу хьхьичI. Счетрайн дирчуми арцуйн цал­сса ка лаллай бакъару, миннух­сса давурттив дуллай, инт дуркIукун, гъилишиврущал, байбишинтIиссару. Цалсса жучIарами арцух зий буру. Гихунмай кумаг буван дакIнийсса, кумаг буванну тIисса инсанталгу чан бакъар, Калининградрай, Санкт-Петербурграй ва Аьрасатнал цаймигу шагьрурдай ялапар хъанахъисса шахьуйнная байбивхьуну.
Мизитрал аьмсса лагру ди­кIантIиссар 10х14. Шикку дикIантIиссар гьарцагу мизитраву чара бакъа дикIан аьркинсса шартIру, — буслай ур МахIаммад.
Вотсаправу сакин бувну бур группа, «Шахува – мечеть» тIисса, аьркинмур кувннащал кувннал ххал бигьин, цIухху-бусу буван бюхъаншиврул.
Жул шяравучу, Дагъусттаннал паччахIлугърал университетрал тарихрал факультетрал деканнал хъиривчу, тарихрал элмурдал доктор, профессор Кьурбанов АхIмад тIий ур.
— ТIайламур бусан, шяравун инсантал бувкIсса чIумал, миннал «зул шяраву чаклин биссун, чак буван чув бюхъантIиссар?» куну, цIувххукун, къатIааьнну бикIайва миннахь шяраву мизит бакъассар тIун. ХIатта миннан тагьар дурчIлай дунугу (дурхха ттигу лакрал цаймигу шяраваллурду мизит бакъасса), ламус шайва. Хъинну ххарира мизит буллай байбишаврия. Му масъала ччянива щаллу банну «бивнугу» бия.
Мизит – му хъанай бур гьарцагу бусурманчунал, ссаячIав цамуния пикри къабуллай, гьарца кьинисса къайгъурдая, вани-тания пикри къабуллай, дакIгу, бакIгу дуаьрдал бувцIуну, Аллагьнайн лаизайсса, цала дурмунил ва данмунил ялув пикри бувайсса кIану, цала аьрщарай дуллалимунил жаваб Заннал хьхьичI дугьлагьисса, ахиратрал ялув пикри буллалисса кIануну. Мизитрал бусурманчунал оьрмулуву хъинну агьамсса ва хъунмасса кIану бугьлагьи­ссар, му жунмагу бувчIлай бур хIакьину, му бувчIлай бивкIссар хьхьичIвасса, хIакьинунин чарий чару къаливчIсса, мизитравун занай бивкIминнангу. Чаклил инсан оьккимуния, кьюкьаламуния махъунай увайссар.
Инсан аьпалул хьуну, шагьрулия шяравун лавсун бувкIсса чIумалгу, хаснува кIинттул чIумал, мизит хъинну хIалуну бикIанссар буххан, бацIан, инсан махъва-махъсса ххуллийн тIайла уккайни дувайсса аьдат-эбадатру щаллу дуван.
ЦIусса мизит буллай байбишаву хьуннав шяравалу цIудуккаврил лишанну. ДакI дарцIуну ура мизитрал хъунмасса кIану бугьантIишиврийн шяраваллил инсантал цачIун бавриву, цIакь бавриву, щаллу буван аьркинсса масъалартту бакIуйн буккан бавриву цалийн бучIавриву. ЦIусса мизитращал архIал шяраву ххи хьуннав паракьатшиву, нахIушиву, дакьаву, кувннан кув бувчIлачIаву. Хъунмасса барчаллагь, мизит баврил сипта цала кIунттихьхьун ларсун, ва даву дайдирхьуминнан ва чIарав бацIаву дуллалиминнан.

Мизит буллалисса давур­ттавух хIала буххан ччиминнан, вана счет:
СБЕРБАНК
4276 6000 1912 3195