Ноябрьданул 2-нний МахIачкъалалив Кировский райондалийсса кIичIираваллин дагъусттаннал машгьурсса журналист, публицист, жяматийсса ишккакку ХIажи Абашиловлул цIа дизлазисса митинг хьунни.

ПатIимат Рамазанова
ДакIнийн бутанну ХIажи АхIмадович 2008 шинал март зурул 21-нний «Узбекгородок» микрорайондалий оьрмулуцIа увшиву. Та ппурттуву ва зий ­уссия «Дагестан» ГТРК-лул хъунаману. ЧIярусса шинну тания мукьах гьарчагу, бувассар ттигу ХIажи АхIмадович оьрмулуцIа увми лякъин.
Мунал цIа кIичIираваллин гьамин та кьини, журналистътурайн къаршисса преступлениярдащал талатисса кьини, дизавривугу тахсиркартал лагу-лявкъуну, танмихIрайн кIункIу бан аьркин­ссар тIисса оьвчавугу чIюхлай дур. Митинграй ихтилатру буллалимигу мукунма тIий бия, мудангу тIайла бакъамунил муттаэну ивкIсса, багьайний багьайкун сивсуну махъ тIий ивкIсса ХIажи Абашилов оьрмулуцIа увми багьайкунсса танмихIрайн кIункIу буван аьркинссар тIий бия. Зиг буллуну гъарал ларчIсса, дяркъусса кьини духьурчагу, чIявусса агьлу бавтIун бия митинграйн: чичулт, журналистътал, дустал, гьалмахтал, гъан-маччами, ХIажи Абашиловлул марцIсса цIанил хIурмат буми. ХIажи АхIмадович мудангу лакрал хIурмат бу­сса, жул редакциялул дуллалисса ккалли дансса гьарца давривухгу хIала уххайсса коллега ия.
Мунал цIаницIун дархIусса, бакIрайра кIицI ларгсса кIа даврия жу балжину бусанну хъиривмур номерданий.