Дагъусттаннал ФСИН-лул управлениялий хьунни 9 зурул лажиндарай дурсса даврил хIасиллу дуллалисса ва уттиния тихуннай дулланмур ккаккан дуллалисса коллегиялул заседание.
Заседание дачин дурну ия ДР-лул УФСИН-лул хъунама, виваллил службалул генерал-майор Муслим Даххаев.
Цала ихтилатраву ванал кIицI лавгунни Дагъусттаннал ФСИН-управление ва мунийн мютIисса идарартту вай 9-гу зурул лажиндарай Аьрасатнал ФСИН-лул каялувчитурал тапшур бувсса ва республикалул УИС-лул давриву хьхьичI-хьхьичI щаллу бан багьлагьисса масъаларттаха зий бивкIшиву. КIицI ларгсса чIумуй дурсса давурттал жям дуллалисса ихтилат бунни Дагъусттаннал УФСИН-лул хъунаманал хъиривчу, виваллил службалул полковник Аьликьади МахIаммадовлул. Ванал бувсунни Управлениялул даврил ккаккиярттая ва диялдакъашивурттая, кIицI бунни ттиния тихунмай щаллу бан багьлагьисса агьамсса масъалартту.
Хъирив идаралул агьамми службардал бувсунни цала-цала дурмуния.
— Дагъусттаннал УИС-лул зузалтрал хIарачат буллай бия тахсиркаршивурттайн къарши бацIаврил масъалартту цинярдагу ихтиярду дуруччай органнащал цачIу щаллу бан, цала идарарттаву къулайсса шартIру дузал дан, щябивкIминнан лайкьсса медициналул кумаг бан, профилактикалул даву гуж дан, къашавайми хъин бан, дуснакьраву щябивкIми ливтIусса ишру чан бан. Хъуннасса къулагъас диркIссар производствалул ва бюджетрал кьатIувсса давуртту чялиш дуккан даврих, коррупциялул тахсиркаршивуртту ашкара даврих, зузалтрал мюхчаншиву дузал даврих, миннал багьу-бизу ххуй баврих, — бувсунни цинявппагу коллегиялий гьаз бувсса масъаларттал жям дуллай Муслим Даххаевлул.
Ахирданий, цинявппагу шикку гьаз бувсса масъаларттал хIакъираву хIукмурду бунни. КIицI ларгсса диялдакъашивуртту чIирисса чIумул дянив дукьан дансса чаран лякъин увкунни.
2016 шинал 9 зурул лажиндарай республикалул УИС-лул дурсса даврил ккаккияртту аьмну оьккисса къархьунни.
ДР-лул УФСИН-лул
пресс-служба
