Сайки 70% МахIачкъалаллал маршруткардал зун бивкIунни цалла маршрутирдай, ливчIминнул заллухъруннал щаллу буллай бур газрансса документру. Мунил хIакъираву бувсунни МахIачкъалаллал администрациялул прессалул къуллугърал.
ХI. Аьдилов
«Документру хIадур байссар сайки 2 нюжмардий. Миннуха зий дур мукьра компания. ЦIанасса ппуттуву машварартту буллай бур республикалул ГИБДД-лул Управлениялущал, документру ччясса чIумуву хIадур баншиврул. Му даву дуванну маршруткалул залуннал дулун аьркинссар 8-8,5 азарда къуруш», — увкунни МахIачкъалаллал промышленностьрал транспортрал ва ххуллул хозяйствалул управлениялул хъунаманал.
ДакIнийн бутанну, октябрьданул 20-нния шинмай республикалий зий бакъая чIявуми маршруткарду. ГИБДД-лул зузалтрал ххал буллай бия газрал балон дусса, яни газрай зузисса маршруткардал шофертурачIа технический паспортрай мугьру бивщуну бурив ягу бакъарив. Мугьру бакъахьурча зун къабитлай бия.
ГИБДД-лул управлениялул хъунама Кирилл Лебедевлул бувсмунийн бувну, маршрутрал таксилул шофернал ласун аьркинссар газрал оборудование дишинсса ихтияр-сертификат, цалла маршрутрай зуншиврул.
